Zergak

Ezohiko funts bat adostu dute Ekarpen Legearen korapiloa askatzeko

Finantzen Euskal Kontseiluak Jaurlaritzak proposatutakoa onartu du. Egokitzapenerako funtsa nahikoa ez denean, funts berria aktibatuko da.

Endika Portillo/Foku

Irune Lasa -

2019ko otsailak 14

2018ko zerga bilketaren kontuak ixtea zen, berez, zeregin nagusia Jaurlaritzaren Ogasun saila, hiru aldundiak eta Eudel biltzen dituen gaurko Finantzen Euskal Kontseiluan. Gai ordenean, ez zegoen Ekarpen Legearen ingurukorik. Nahiko argi zegoen, ordea, gaurkoan hizpide inportanteena 2011. urtetik luzatuta dagoen lege hori izango zutela.

Gipuzkoako Aldundia gehiago, eta Arabakoa pixka bat gutxiago, aspalditik kexu dira Ekarpen Legeak ezartzen dituen koefiziente horizontalekin, zeintzuek zergatan bildutako dirutik lurralde bakoitzak kutxa komunean zenbat diru jarri behar duen zehazten duten. Baina, azken lau urteetan ez da aurrerapausorik izan legearen erreformarako eta azken asteetan gauzak ez zeuden errazagoak.

Horregatik, Markel Olano Gipuzkoako ahaldun nagusiaren azken apustua Egokitzapenerako Funtsa handitzea zen; hots, koefizienteen eta diru bilketen arteko desorekak berdintzeko xedez bere garaian eratutako diru zorroa handiagoa izatea. Hori izan zitekeen Jaurlaritzak eta Bizkaiak diru gehiago jartzeko bidea. Besteak beste, berriz gerta zitekeelako 2018an jazo dena, Egokitzapenerako Funtsa ez dela nahikoa izan berdintzeko Arabak zein Gipuzkoak kutxa nagusira egin beharreko ekarpena eta egiaz zergatan bildutakoa.

Baina azkenean Jaurlaritzaren beste proposamen batetik etorri da akordioa. Haren arabera, Egokitzapen Funtsa ez da handituko eta zergatan bildutakoaren % 1a izango da orain ere erreferentzia hornidurarako —Jaurlaritzak %70 jarrita eta aldundiek %30—. Baina Egokitzapenerako  Funtsa ez denean nahikoa, lurralderen baten diru bilketa egin beharreko ekarpenaren azpitik gelditzen bada —koefizientearen %99 baino gutxiago bada—, Ezohiko Funtsa aktibatuko da. Funts hori diru baliabideen %0,45ekoa izango da (60 milioi inguru), Jaurlaritzak jarriko du diruaren erdia eta aldundiek beste erdia —koefiziente horizontalaren arabera—, eta ekitaldiaren likidazioan aplikatuko da.  

2018ko ekitaldian Jaurlaritzak eta Bizkaiak 2,8 milioina euro jarriko dituzte Araba eta Gipuzkoa %99 horretara irits daitezen. 1,6 milioi Arabarentzat izango dira, eta 4,04 milioi Gipuzkoarentzat.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna

Izan zaitez BERRIAlaguna

Irakurtzen ari zaren edukia libre ematen jarraitu nahi dugu. Euskaraz informatzea da gure eginkizuna, zure eskubidea. Sareko irakurlea bazara, konprometitu zaitez irakurtzen ari zarenarekin. Geroa zugan.

Izan zaitez BERRIAlaguna