Aljeriako presidente Abdelaziz Buteflikak jakinarazi du ez dela aurkeztuko hurrengo presidentetzarako hauteskundeetara. Apirilaren 18rako deituta zeuden hauteskundeak atzeratu ditu, eta konferentzia nazional "independente eta inklusibo" batera deitu du.
Orain arte lehen ministro izandako Ahmed Ouyahiak, berriz, dimisioa aurkeztu du, hango telebista kateek jakinarazi dutenaren arabera. Gainera, Buteflikak esan du konstituzioa berritzeko erreferenduma egingo dutela Aljerian. Azken asteetako protesta "gogorren" ostean eman du berria presidenteak, eta pozik hartu dute herritarrek.
Gaur amaitu da Aljeriako presidentearen hogei urteko agintea, beraz. Martxoaren 3an jakinarazi zuen apirileko presidentetzarako hauteskundeetara aurkeztuko zela, eta, bozak irabaztekotan, urtebete barru dimisioa aurkeztuko lukeela. Horretaz gain, zehaztu zuen konstituzioa berritzeko erreferendum bat egingo lukeela herrialdean.
Aurkeztutako bi baldintza horiek ez zituzten baretu Aljeriako herritarren protestak. Herritarrek "trikimailutzat" hartu zituzten eskaintzak, eta oposizioko alderdiek ere ez zuten begi onez ikusi Buteflikak aurkeztutako hautagaitza: iritzi zioten Buteflika ez zela gai herrialdearen lider izaten jarraitzeko.
Aljeriako ehunka epaile batu dira gaur kaleetako protestetara, eta esan dute batzorde bat sortuko dutela herrialdeko sistema politikoa aldatzeko. Epaileak ez ezik, oposizioko sei alderditako diputatuak ere parlamentutik irten dira Buteflikaren hautagaitza salatzeko, eta bat egin dute kaleko protestekin.
Gazteek abiatu zituzten herrialdean orain arte izan diren protestarik "indartsuenak", baina azken egunetan jende andana bildu da antolatutako mobilizazioetan.
Denbora "gehiegi" karguan
Buteflikak 82 urte ditu, eta gaixo dago 2013az geroztik—buruko isuri baten ondorioz—. Azken bi asteetan, Suitzako ospitale batean egon da, "ohiko zaintzak" jasotzen; gobernuak ez du azaldu nola dagoen presidentea osasunez. Izan ere, Buteflika ez da jendaurrean agertu 2012ko maiatzean egin zuen agerraldiaz geroztik, eta 2014ko hauteskundeen kanpainan ere ez zuen hitzaldirik eman. Aljeriako gazte askok diote ez dakitela nor den ere.
Azken asteetan, herritarrek salatu dute denbora "gehiegi" eman duela Buteflikak presidente karguan, eta herrialdeak aldaketa baten beharra duela. Nabarmendu dute ez dela gai izan aljeriarren arazoak konpontzeko, eta, horien artean, gazteen arazoak, batik-bat: kalean egindako mobilizazioetan salatu dituzte pobrezia, migrazioa eta itxaropen falta. Gainera, gogor kritikatu dute presidenteak herrialdearen arazo ekonomikoen aurrean izan duen jarrera: petrolioaren jaitsierak ondorio larriak eragin ditu herrialdearen ekonomian.
1999an izendatu zuten Buteflika Aljeriako presidente, 63 urte zituela, eta 2004ko hauteskundeetan bigarren aldiz irabazi zituen bozak. Lau urte geroago, konstituzioa aldatu zuen, hirugarrenez presidentetzarako hautagai izan ahal izateko. Apirileko hauteskundeak irabazi izan balitu, 2023. urtera arte egongo zatekeen agintean.
