Mobilizazioak antolatu zituzten lehengo astean Irisarriko eta Mendibeko (Nafarroa Beherea) eskola publikoetan, eskola gutun berrian hartutako neurriek sail elebidunari kalte eginen diotela salatzeko. Gaur, prentsaurrekoa eman du Ikas Bi sail elebiduneko guraso elkarteak, eta dei egin die hautetsiei akademiako zuzendariari "baliabideak eman ditzala" eska diezaioten.
2008ko zirkular batean, ama eskoletan gehienez ere 25 ikasle eta lehen mailan gehienez ere 22 ikasle behar zirela zioen akademia ikuskaritzak. Heldu den ikasturtean bederatzi eskoletan gaindituko dute kopuru hori, Ikas Bi-k salatu duenez. Halaber, Ainhoako, Itsasuko (Lapurdi), Ahatsa-Mendibeko eta Donamartiri-Donoztiriko (Nafarroa Beherea) eskoletan, ikasle kopurua gainditzeaz gain, maila ezberdinetako ikasleak nahasiko dituzte. Halaber, ama eskolan irakaskuntza osoa euskaraz egin ahal izateko hiru eskoletako esperimentazio proiektuak "blokeatuak" izan direla salatu dute. "Herriko etxeen, EEPren eta gurasoen babesa zuten proiektu horiek, alta, ez dira eskola kartan ageri. Alta, eredu horrek euskararen irakaskuntzan hobekuntza nabarmenak erakutsi ditu", Celine Etxebarneren hitzetan.
Lizeoko erreforman tokiko hizkuntzen irakaskuntza ez da aipatua, horregatik, azken hilabeteetan Hezkuntza ministerioarekin kontaktuan direla jakinarazi du Thierry Delobel Ikas Bi-ko presidenteak. Haren hitzetan, ez-aipatze horrek akademietako errektoreen esku utziko du sail elebidunentzat baliabideak erabakitzeko ardura, eta beraz erabakiak hartu beharko dituzte. "Arriskua da kasu batzuetan sail elebidunak kaltetuak izatea baliabide faltagatik. Eta beste kasu batzuetan, arrazoi ideologikoengatik hartzea erabakia, errektore batzuek pentsatzen baitute ez dagokiola irakaskuntza publikoari tokiko hizkuntzen transmisioa bermatzea". Bestalde, erreformak tokiko hizkuntzak erabat "gutxietsiko" dituela salatu du. "Hautazko ikasgaietan, atzerriko eta antzinaroko hizkuntzen gibeletik agertzen dira. Erabat anakronikoa da".
