Futbola-Lehen Maila

Alaves berandu iritsi da partidara (0-4)

Atletico Madrilek bi gol sartu ditu lehen hamar minutuan, eta Gasteizko taldeak ezin izan du emaitza irauli

John Guidetti atsekabe keinuarekin, aukera bat huts egin ondoren.
John Guidetti atsekabe keinuarekin, aukera bat huts egin ondoren. A. R. H. / EFE

Imanol Magro Eizmendi -

2019ko martxoak 30

Golak. 0-1: Saulek (4. min.). 0-2: Diego Costak (11. min.); 0-3: Moratak (59. min.); 0-4: Thomasek (84.min.).

Alaves berandu iritsi zen atzo Mendizorrotzara. Autobusa galdu edo azken garagardoa luzatzen duten zaleen pare ibili zen, eta garesti ordaindu zuen. Horiek, normalean, ikuskizunaren lehen hamar minutuak galtzen dituzte. Alavesen kasuan, baina, okerragoa izan zen, ikuskizunaz gain partida bera era galdu zuelako. Atletico Madrilek ondo baliatu zuen etxekoen lozorroa 11 minututan bi gol sartzeko, eta jakina da horrelako errenta bat hartzen badu ia ezinezkoa da Madrilgo taldeari gaina hartzea.  

Ez da hanka sartze larria, Atleticoren aurka galtzea emaitza logikoen artean baitzegoen, baina bai modua, hasiera kenduta, Alavesek, 0-3koa jaso arte behintzat, ez zuelako irudi txarrik eman. Eta ondo hasi izan balitz? Ezin jakin, baina orain ez du zentzurik horrelako hipotesiak planteatzeak. Hori bai, Getafe pasatu eta Txapeldunen Ligako postuetara itzultzeko aukera galdu zuen. Dena den, Gasteizko taldeak hobe du erretrobisoreari begira jarraitzea. Atzetik ditu Sevilla eta Valentzia eta gaur elkarren aurka jokatuko dute.

Alaves berandu iritsi bazen, Saul Iñiguez Atletico Madrilen erdilariak ezin biziago ekin zion partidari. Bi aukera garbi izan zituen lehen bost minutuetan. Aurrenekoa Pachecok gelditu zuen, baina bigarrenean ez zuen kale egin. Ximo Navarrok huts larria egin zuen baloiarekin eta Saulek baliatu zuen Griezmannek berreskuraturiko baloia (4. min.).

Atleticok goiz jo zuen lehen kolpea, eta haren segidan bigarrena. Diego Costak gol bikaina sartu zuen. Baloia area ertzean jaso zuen, eta hanka geldian jaurtiz ezkerreko zutoinaren alboan jarri zuen baloia (11.min.). Ordu laurdena pasa gabea zen eta Simeonek bezperan amesturiko tokian zuen partida. Abelardo, aldiz, sututa zegoen, azken bi asteetako etenaldian partida prestatzeko eginiko lan guztia kareletik joan zen.

Atletico espezialista da horrelako egoerak kudeatzen, baina Alaves ez zen abaildu. Partida guztia zuen aurretik eta golaren bila jo zuen. Fedez joan zen aurrera, Jonyri, taldeko onenari, jarraiki. Aukera garbiena, dena den, Pinak izan zuen, erdiraketa batean. Haren burukada ateko marratik atera zuen Saulek (28. min.).  
 Alaves saiatu zen bigarren zatiaren hasieran, eta Abelardok, agian, berandu egin zituen aldaketak. Arriskatu beharra zeukan, eta Atleticok atzeko zuloak baliatu zituen kontraeraso batean 0-3koa sartzeko (57. min.). Orduan bai, jota gelditu zen Alaves. Thomas izan zen zaurian hatza sartzen azkena, gol ederra sartuz 86.minutuan. Alavesek ostegunean du hurrengo partida, Sevillaren zelaian, ea atzoko astinduak ez dion ondorio larririk uzten. 

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna