Gasteizko Sidenorreko lantegian garraiolari bat hil zen atzo. ELA, LAB, ESK, Steilas, EHNE eta Hiru sindikatuek "istripu ez-traumatikoa" izan zela salatu dute gaur, ohar bateratu baten bidez, eta gaineratu dute askotan "heriotza natural" moduan saiatzen direla ezkutatzen lan istripu direnak.
Garraio sektoreko lan istripuak trafiko istripu gisa ezkutatzen direla ere salatu dute, zenbakiak "beldurgarriak" direlako. "2018an, 68 pertsona zendu ziren lan istripuz. 24 errepidean. Horietatik 15, garraiolariak. 2019an, 15 dira jada lan istripuan hil diren pertsonak".
Joan den astean beste garraiolari bat hil zen Pasaiako portuan (Gipuzkoa), eta sindikatuek adierazi dute ez dutela kasualitateetan sinisten, "kausalitateetan" baizik. Sindikatuen esanetan, "presa, estresa, bidaien salneurri baxuak, ezinezko ordutegiak, lanegun luzeak, egin behar ez luketen eta askotan beharturik egiten diren kamioi zamaketa eta hustuketa lanak eta administrazioaren utzikeria" dira sektoreko langileen artean izaten diren heriotza askoren eragileak. "Lan baldintzak ez dira onak; prekaritatea garraiolarien egunerokoa da. Garraioak berehalako erregulazioa behar du, kooperatiba faltsurik gabeko sektore bat, ia esklabotzan bizi den gidaririk gabeko sektorea", gaineratu dute.
