Hamabi urteren ondoren, Europan lehiatuko da Bidasoa berriz ere. Bartzelona eta Granollersen arteko partidara begira zeuden gaur Irungo taldeko kideak, eta espero zuten emaitza iritsi da: 38-27 irabazi du Bartzelonak, eta horrenbestez, gutxienez EHF kopan aritzeko txartela ziurtatua du Bidasoak. 2007an jokatu zuen azkenekoz, EHF kopako final-laurdenetan, CAI Aragoiren aurka.
💛💙 Berriz ere Europan! 💛💙
— CDBidasoa-Irun (@CDBidasoaIrun) 2019(e)ko maiatzaren 8(a)
💛💙 ¡De nuevo en Europa! 💛💙 pic.twitter.com/Ab8mWXxafW
Klubak adierazi du lanean ari dela dagoeneko EHFk ezarritako baldintzak bete ahal izateko, eta kide guztiak zoriondu ditu ohar baten bidez. Denboraldia ez da amaitu, ordea, eta oraindik ere sari hobea lor dezake Irungo taldeak. Bigarren da sailkapenean, eta postu horretan amaituz gero, Txapeldunen Ligan joka dezake.
Logroño da haren aurkari nagusia, hirugarren baita, puntu bakarrera. Bi taldeok elkarren aurka jokatuko dute hilaren 18an, eta ezusterik ezean, egun horretan erabakiko da dena.