Amiantoak langileen osasunean ondorio larriak ekarri dituela, eta biktima kopurua gero eta handiagoa dela ohartarazi dute trengintza sektoreko langileek. Beasaingo CAFen, esaterako, 37 hildako zenbatu dituzte, amiantoaren eragin gisa aitortutako gaitzen ondorioz. Benetako kopurua, ordea, handiagoa dela azaldu dute. Izan ere, gaitz batzuen kasuan ez da aitortzen oraindik amiantoaren eragina. Gainera, beharginek azaldu dute material horrekin harreman zuzenean lan egiten ez dutenak ere kaltetu dituela, "airean dagoena arnastuz, edo baita etxeko lanetan oinarrituak edo egoera txarrean daukagun materiaren desgastea tarteko".
Gaiaren inguruko "isiltasuna" hautsi eta indarrak batzeko deitu dituzte gaurko mobilizazioak Beasaingo eta Irungo CAFeko, eta Bilboko Metroko eta Euskotreneko enpresa batzordeek. Euskal Herritik kanpo, bat egin dute Bartzelonako eta Madrilgo Metroko, Trenasako eta Madrilgo eta Zaragozako CAFeko langileek ere. Beasainen, esaterako, manifestazio jendetsua egin dute; amiantoaren biktimen gertukoak dira aurretik, eta Amiantoak hil egiten du lelodun pankarta eraman dute atzetik. Bi orduko geldialdia ere egin dute.
Amiantoak hil egiten du! Sekulakoa CAFetik abiatu den manifestaldia, eta izugarria buruan senideren bat galdu dutenen artean hainbeste ezagun ikustea, benetan erraiak astintzeko modukoa. Ez dago eskubiderik! #amiantoakhilegitendu#elamiantomata#amiantopic.twitter.com/O4EiTaGXe0
— Adur Ezenarro (@dur3zenarro) 2019(e)ko maiatzaren 10(a)
Eskaera argiak zabaldu dituzte langileek: amiantoa desagerraraz dezatela; gobernuek, patronalek, administrazioek eta enpresek erantzukizuna onar dezatela; zaintza planak, sendatzeko ikerketa eta gaixotasun hori jasaten dutenentzako beharrezko laguntzak hobetu ditzatela; eta eragina jasandako langileei beharrezko koefiziente murriztaileak eta, noski, beharrezko kalte-ordainak eman diezazkietela.
Eskaera horiek betetzeko, dekalogo bat ere aurkeztu dute. Hamar neurri jaso dituzte: besteak beste, konpentsazio funts bat aktibatzeko; arriskuan diren langileen zerrendak egiteko; amiantoarekin lotutako gaitzak aitortzeko; ikerketa finantzatzeko; amiantoarena osasun publikoko arazo gisa hartzeko; eta amiantoak eragindako gaitzen eta harekin lan egiten duten enpresen erregistroa osatzeko eskatu dute.