10:00 aldera heldu dira Espainiako Diputatuen Kongresura Oriol Junqueras ERCko diputatua eta Junts per Catalunyako Jordi Sanchez, Jordi Turull eta Josep Rull. Poliziaren ibilgailuetan eraman dituzte Soto del Real espetxetik Kongresuraino, eta, han, Kongresuko segurtasun indarren esku geratu dira behin-behineko espetxealdian dauden lau diputatuak.
Epailearen baimenarekin joan dira Kongresura lau preso politikoak, apirilaren 28ko bozetan hautatuak izan zirela bermatzen duten dokumentuak aurkeztu eta diputatu aktak jasotzera. Diputatuen ganberan zain zituzten Gabriel Rufian ERCko kidea, Miriam Nogueras JxCatekoa eta EH Bilduko Marian Beitia Larrangoitia eta Jon Iñarritu.
Kazetariei adierazpenak egiteko aukerarik ez die eman epaileak preso politikoei, baina ERCko alderdikideek bideo labur bat zabaldu dute sare sozialetan Junquerasen adierazpenekin. Generalitateko presidenteorde izandakoa pozik agertu da alderdiak Espainiako hauteskundeetan lortutako hamabost diputatuekin, eta nabarmendu du "ohorea" dela Kongresuan egon ahal izatea. Aldi berean, ez du aukera galdu datorren igandeko bozetan ERCren alde bozkatzeko eskatzeko.
Estic molt orgullós de tots vosaltres! Us estimo! pic.twitter.com/O9kEHNIWuQ
— Oriol Junqueras ðŸÂÂÂÂŽ—ï¸Â (@junqueras) 2019(e)ko maiatzaren 20(a)
Egin beharreko tramiteak amaituta, kartzelara itzuliko dira buruzagi subiranistak. Bihar, ordea, bigarrenez joan beharko dute diputatuen ganberara Kongresuaren batzar eratzailean parte hartzeko.
Ordu bertsuan heldu da Senatura Raul Romeva ERCko senataria ere. Hura Guardia Zibilaren ibilgailuan eraman dute Clara Campoamor aretoraino. Han, ERCk Senatuan duen taldeko burua zuen zain: Mirella Cortes.
Dena den, politikari subiranisten aurkako auzia zuzentzen duen Manuel Marchena Goreneko epaileak Gorteen esku utzi du lau diputatu presoen eta Romevaren aktak bertan behera uzteko eskumena, gogoraraziz horretarako aukera ematen duela Diputatuen Ganberako araudiak.
