Osasuna Lehen Mailara itzuliko dela jakin bezain laster hasi ziren festan zaleak. Ospakizun giro betea piztu zen gorritxoen artean, Albaceteren eta Granadaren arteko partida amaitu orduko —Granadak irabazi zuen, eta horri esker, Lehen Mailarako sailkatu zen Osasuna—. Gaztelu plaza hartu zuten milaka lagunek, eta taldeari itxaron zioten han. Jokalariak, talde teknikoa eta zuzendaritza iritsi orduko, kantu eta oihuek hartu zituzten Iruñeko kaleak.
😠IKARAGARRIA ðŸ˜ÂÂÂÂ#ItzuliGara#GorrizAmestupic.twitter.com/Bg3l1nt8ZW
— C. A. OSASUNA (@caosasuna_eus) 2019(e)ko maiatzaren 20(a)
Plazako kioskotik eman zizkieten eskerrak jokalariek: "Talde ausart eta borrokalaria gara. Gora Osasuna!". Jagoba Arrasate entrenatzaileak, esaterako, "poz handia" erakutsi zuen Sadarren egindako adierazpenetan. "Futbolari onak ditugu, eta talde gisa jokatu dute", esan zuen Arrasatek: "Hor egon da Lehen Mailara igotzeko gakoa". Gorengo mailan zer espero dute galdetuta, "gerra emango" dutela ziurtatu zuen entrenatzaileak.
Atzoko festaren ondoren, gaur jarraituko dute ospakizunek: arratsaldean harrera egingo diete taldeko kideei Nafarroako Gobernuan (18:00) eta Iruñeko udaletxean (19:00).