Gipuzkoako Foru Aldundian zahar etxeetako langileak egiten ari ziren protestaren berri ematen ari zela, Ertzaintzak identifikatu egin du gaur arratsaldean Arantxa Iraola BERRIAko kazetaria. Iraola une horretan sare sozialetan ari zen gertatzen ari zenaren berri ematen, BERRIArentzat lanean.
Ertzaintza Aldundiaren egoitzara joan da gaur, eraikinaren barruan protestan ari ziren zahar etxeetako langileak ateratzera. Goizean hasi da protesta eta arratsaldeko lehen orduan atera dituzte zahar etxeetako langileak. Horretarako prest zirela, identifikatzeko eskatu diote Arantxa Iraolari. Gertaeren jarraipena egiten ari zen, eta hainbat irudi hartu ditu Foru Jauregiaren inguruan.
Iraolak nortasun agiria eman die poliziei, eta hiruzpalau minuturen bueltan itzuli diote. Iraolak ertzainei argitu die kazetaria dela, eta lanean ari zela une horretan.
Iraola ez da bakarra izan. Irudiak hartzen ari zen herritar gehiagori ere eskatu die identifikatzeko Ertzaintzak. Besteren artean, BERRIArentzat lanean ari zen Foku enpresako argazkilari.
Eraikinaren kanpoaldean irudiak hartzen aritu diren herritarrez gain, aldundiaren egoitzaren barruan protestan aritu diren langileak ere identifikatu dituzte.
Atera aurretik, jendea identifikatzen ari dira. 20 emakume inguru dira, denak identifikatuko dituztela dirudi. Kanpoan, hainbat pertsona identifikatu gaituzte argazkiak egiteagatik. Ane Sarriegi da kanporatu dutenetako bat, bideoan haren hitzak. @berria@LABsindikatuapic.twitter.com/yYM3ylo6yV
— Arantxa Iraola (@ArantxaIraolaAl) 2019(e)ko maiatzaren 21(a)
