Carles Puigdemont eta Toni Comin ezin izan dira Europako parlamentuan sartu gaur, joan den maiatzaren 26ko hauteskundeetan eurodiputatu hautatu zituzten arren. 17:00ak aldera joan dira Lliures per Europa hautagaitzako kideak, baina segurtasun langileek ez diete pasatzen utzi, europarlamentari aktarik ez zutela argudiatuta. Espainiak europarlamentarien zerrenda ofiziala bidali behar du Bruselara, baina bitartean, behin-behineko akreditazio batekin ibili ohi dira parlamentari hautatuak. Haren bila joan dira Puigdemont eta Comin ere, baina gainerakoak ez bezala, atarian gerarazi dituzte.
Behin-behineko akreditazioak banatzeko, zerrenda bat zeukaten segurtasun langileek. Berri agentziek baieztatu dutenez, gainera, zerrenda horretan ageri ziren Puigdemont eta Comin ere, baina ikur batekin markatuta zituzten haien izenak, sartzen ez uzteko.
Bruselara hurbildu gara gaur â¦@GUENGL gure taldeko batzarrera eta â¦@EFApartyâ©-rekin egotera, eta â¦@KRLSâ© presidentari gure sostengua adierazi diogu berari eta @toni_comin hautetsiari akreditazioa ukatu dietelako @ehbildu#LlibertatPresosPoliticsiExiliatspic.twitter.com/T7TR1N68J6
— Pernando Barrena (@pernandobarrena) 2019(e)ko maiatzaren 29(a)
Beste parlamentari batzuk ere joan dira gaur akreditazio horren bila; tartean, Pernando Barrena (EH Bildu) eta ERCko kide batzuk. Haiei utzi diete sartzen, baina Puigdemont eta Comini ez.
Espainiako Senatuak kargua eten dio Raul Romevari
Cristina Narbona Espainiako Senatuko presidenteordeak jakinarazi duenez, Senatuak kargua eten dio Raul Romeva Kataluniako Atzerri Gaietarako kontseilari kargugabetu eta ERCko senatariari. Romeva Kataluniako prozesu subiranistaren kontrako auzian auzipetuta dagoela eta espetxeratuta dagoela argudiatu du mahaiak erabakia arrazoitzeko. Narbonak azaldu du Prozedura Kriminalaren Legeak karguen etetea aurreikusten duela bi baldintza horiek betetzen diren kasuetan.
Romevaren kargu etetearekin, ERCk Senatuan dituen 13 ordezkarietako bat galdu du. Beste lau senatari JxCri utzi dizkio hark talde propioa eratu dezan. Taldea eratzeko gutxieneko ordezkari kopurua hamarrekoa bada ere, ERCk ez du taldea osatzeko arazorik izango, EH Bildurekin tade bateratua osatuko baitu.
