Datorren astean bi hilabete beteko dira Sudango armadak Omar al-Baxir presidentea agintetik kendu zuenetik, haren aurkako protestek hartu zuten indarraren ondorioz. Al-Baxirrek hiru hamarkada zeramatzan agintean, 1989an estatu kolpe bat eman zuenetik.
Halere, hura agintetik kendu duten arren, egoera politikoa oso ezegonkorra da oraindik. Boterean dagoen kontseilu militarrak astearte honetan erabaki du bederatzi hilabete barru hauteskundeak egitea. Baina oposizioko alderdiek eta kaleko protestak antolatu dituzten taldeek ez dute hori onartu.
Liskar giroa handia da, izan ere. Eta herenegun gertatu ziren istiluek asko gaiztotu dute giroa. Medikuen Batzorde Zentrala sindikatuaren arabera, militarrek 35 pertsona hil zituzten oposizioak armadaren egoitza parean antolatu zuen kanpaldiari tiro eginda, Khartum hiriburuan.
Kontseilu militarrak eta oposizioak, berez, hiru urteko trantsizio aldi bat egitea hitzartu zuten joan den hilean, baina ez dira ados jarri trantsizio hori nola egin. Abdel-Fattah al-Burhan kontseiluko buruak bukatutzat eman du akordioa.
