Apirilean egin zuten apustu etxeen aurkako kanpaina Andoainen (Gipuzkoa), "gaia gizartean hartzen ari den oihartzuna eta zabaltzen ari den kezka" aintzat hartuta, "beste udalerri batzuetan gaia lantzen ari direnekin bat egin eta kontzientziazio lana egiteko". Besteak beste, hitzaldi bat ere antolatu zuten ekainaren 10erako, ludopatiaren eta adikizioen inguruan, Errenteriako Ekintza Bibe (Bizi Berria) elkarteko kideekin. Kanpaina horren baitan apustu etxeen kontrako kartelak jartzeagatik, hiru lagun deklaratzera deitu zituzten. Hirurak absolbitu egin dituzte.
Kanpainaren sustatzaileek azaldu dutenez, ez zuten beste erabakirik espero. "Kartelak ipintzea ezin du izan delitu, kartel horietan mehatxu, irain edo bestelakorik agertzen ez den bitartean". Apustu etxeen kontrako mugimenduaren "zilegitasuna" aldarrikatu dute, apustuen gaia gizartean "inoiz baino piztuago" dagoenean. Horre adibide aipatu dute Valladolid taldeko zazpi jokalari atxilotu dituztela Espainiako ligako azken jardunaldian emaitza adosteagatik, Realeko bazkideen %85 apostu etxeen publizitatea onartzearen kontra agertu dela eta EITBk apostu etxeen iragarkiak emateari utziko diola.
Apustu etxeen aurka agertzera deitu dituzte herritarrak. "Arazo honek gazteengan duen eragin kaltegarria eta sortzen ari diren famili desestrukturazioak gero eta ugariagoak dira. Gizarte bezala, gure eginbeharra da egoera hauek bideratzea".