Osorik ez izan arren, Bilboko gizarte arloko auzitegi batek onartu egin du S.C.L langilearen familiak egindako eskaria, eta 90.000 euroko kalte-ordaina ematera zigortu du Izar itsasontzigintza enpresa. Asviamie amiantoaren biktimen elkarteak jakinarazi duenez, 2018an hil zen langilea, amiantoa arnasteak eragindako laringeko minbiziaren ondorioz. 78 urterekin hil zen, 1954 eta 1984 artean lanean aritu ondoren.
Familiak argudiatu zuen enpresak ez zituela beharrezko segurtasun neurriak bete, eta heriotza lotuta zegoela amintoarekin lan egin izanarekin. 180.000 euroko ordaina eskatu zuten senideek, baina auzitegiak erdira murriztu du kopuru hori, hildakoa erretzailea zelako eta lanerako ezintasuna aitortu ziotelako adin batetik aurrera.
Asviamiek kritikatu du "garaia" dela segurtasun neurriak urratu dituzten enpresek barkamena eskatu eta kalteak ordaintzeko funts bat sor dezaten. Osakidetzaren jarrera ere kritikatu du elkarteak: 2008an aitortu zuen langilearen minbizia lan gaixotasuna izan zitekeen "susmoa" zuela, baina ez zuem jakinarazi 2017ra arte, gaixotasun profesional gisa aitortzea zailduz.
Maiatzean, amiantoaren kalteen erantzukizuna onartzeko eskatu zieten trengintza sektoreko langileek enpresei eta administrazioari.
