Txirrindularitza talde kirola ez dela ustea duenak ikus dezala Tourreko gaurko etapako azken kilometroa. Arreta berezia jar dezala Deceuninck - Quick Stepen taldearen lanean. Kilometro horretan taldeko horretako lau txirrindulari ezberdin egon dira tropelekoa buruan, edo beste modu batera esanda, modu ezin hobean bideratu diote esprinta Elia Vivianiri. Alde pixka batekin ekin dio azken estutualdiari, eta ondo borobildu du lana. Etapa luze eta laua izan da, eta ez da aldaketarik egon sailkapen nagusian. Julian Alaphilippe da lider (Deceuninck -Quick Step), eta hogei segundoko aldea du Wout Van Aertekiko.
Etapa hasi eta berehala egin dute ihes Yoann Offredok, Frederik Backaertek (Wanty) eta Michael Scharrek (CCC), eta 200 kilometro egin dituzte ihesean tropelak Nancyko helmugatik hamabost kilometrora irentsi zituen arte. Nolabait, orduan hasi zen esprinta, esprinterrak dituzte taldeek asko bizitu zutelako erritmoa. Lilian Calmejane (Direct Energie) saiatu zen esprinta hausten, baina ordutako tropela ziztu bizian zihoan.
Deceuninck - Quick Stepek hartu du esprintaren lema, eta azken kilometroan Julian Alaphilippe jarri da tropelaren buruan. Elastiko horiak ilaran jarri du tropela, eta haren tokia hartu du gero Michael Morkovek. Max Richeze izan da azken aurrekoa, eta haren gurpilera itsatsi da Viviani. Kokapen ona ondo baliatu du eta hark altxatu ditu besoak Nancyko helmuga marran. Alexander Kristoff (UAE), bigarren, izan da gehien estutu duena,baina hura ia bakarka aritu da. Caleb Ewan (Lotto) izan da hirugarren, itxita gelditu ondoren, eta Peter Sagan (Bora) laugarren.