Azkarra eta garbia izan da laugarren entzierroa ere. Bi minutu eta 19 segundoan sartu dira plazara Jandilla ganadutegiko zezenak. Aurreko urteetan arrisku uneak eta adarkatu ugari eragin badituzte ere, ez da hala izan gaurkoan. Baina hainbat korrikalari artatu behar izan dituzte kolpeen ondorioz; haietako lau, gainera, erietxera eraman behar izan dituzte.
Suziria lehertu orduko zabaldu dituzte kortako ateak, eta irten dira joaldunak eta zezenak Iruñeko karriketara. Taldean joan dira ia bide guztian animaliak, eta ugari izan dira haien artean sartzeko ahaleginean elkarri traba egin eta erori diren korrikalariak.
Estafeta inguruan, zezenetako bat atzean geratu da bi joaldunekin batera, gainontzekoak kailejoira zihoazen bitartean. Baina segundo gutxi batzutako atzerapena izan da hiru animaliena. Berehala sartu dira haiek ere plazara.