Arratsaldean jaso zuten deia atzo larrialdi zerbitzuetan: itota zegoela 4 urteko ume bat Azpeitian (Gipuzkoa), baserri batean. Anbulantziako kideak saiatu ziren haurra suspertzen, baina ezin izan zuten ezer egin. 18:00 aldera gertatu zen, Lasao inguruko etxe batean.
Ertzaintzak ikerketa zabaldu zuen heriotza zer-nola gertatu zen argitzeko, eta hipotesi nagusia da hilketa bat izan dela. Uste dute amak hil zuela umea, eta bere buruaz beste egiten saiatu zela ondoren, zauriak eraginda. Donostiako ospitalera eraman zuten emakumea.
Haurraren gorpuari gaur diote autopsia egitekoa, eta horren arabera emango dituzte pauso gehiago ikerketan.
Hilketak zirrara eragin du Azpeitian, eta udalak ohar bat kaleratu du. Samina agertu du gertatutakoagatik, eta babesa eskaini dio sendiari. "Denentzat oso momentu gogorra da", adierazi du Nagore Alkorta alkateak. Ohartarazi du Ertzaintza ikertzen ari dela zer gertatu zen, eta esamesetan ez aritzeko eskatu du: "Utz ditzagun alde batera espekulazioak eta zurrumurruak, momentu gogor hauetan inori ez diotelako onik egiten, kalte baizik".
