Enpresak

Siemens Gamesak itsasoko 11 haize errota egingo ditu, Norvegiarako

Equinor konpainiaren proiektu baterako egingo dituzte haize errotak. Halako plataformarik handiena izango da munduan, Zamudioko enpresak nabarmendu duenez.

Gamesaren haize errota bat Kanarietan, artxiboko argazkian.
Gamesaren haize errota bat Kanarietan, artxiboko argazkian. Ángel Medina G. / EFE

Hodei Iruretagoiena -

2019ko urriak 31

11 haize sorgailu egingo ditu Siemens Gamesak, energia eolikoa lortzeko Norvegiako itsas plataforma baterako. Ohar bidez azaldu dutenez, munduko itsas plataforma handiena izango da Equinor konpainiaren proiektua, Hywind Tampen izenekoa; lehen aldiz, gas eta petrolio plataformak hornituko ditu. Denera, 88 megawatt sortzeko gaitasuna izango du, eta Zamudiko enpresaren arduradunen esanetan, urtero 200.000 tona CO2 isurtzea eragotziko dute. Itsas plataforma hori 2022 amaierarako martxan jartzea espero dute, eta 2030erako hamabi milioi etxeri energia ematea.

Siemens Gamesak lehen ere egin izan du lan Equinor konpainia norvegiarrarekin, 2009tik aurrera. Gaur iragarritako proiektu hori garatzen aritu da, eta baita Eskoziako Hwind Scotland proiektuan ere. Gaur egun, horixe da maila komertzialean itsasoko parke eolikorik handiena.

Lurrekoetan ez ezik, offshore edo itsasorako haize erroten negozioan hazten ari da Siemens Gamesa. Joan den astean, Alemaniako Senvionen zati handi bat erosi zuela jakinarazi zuen. Tartean. Vagosko (Portugal) lantegia. Handik hamabost kilometro eskasera, Aveiron, produktua azkar itsasoratzeko portua du, eta produkzio kostuak merkatzeko aukera emango dio. Siemens Gamesak badu haize erroten fabrika bat Agoitzen (Nafarroa), eta, ondorioak ikusteko dauden arren, erosketa hori kezkaz hartu dute sindikatuek.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna