Albistea entzun

Komunikazioa

BERRIAk podcast feminista bat egingo du hamabostean behin

Asteazkenean estreinatuko dute podcasta, Berria FM izenarekin. Umorezko atal bat ere izango du.

Urtzi Urkizu -

2019ko azaroak 18

Kirmen Uribe idazlearena izan zen BERRIAren lehen podcasta, Ane Irazabal kazetariarena iritsi zen gero, eta, asteazkenetik aurrera, Berria FM podcast feminista izango da entzungai. Maider Galardi kazetariak zuzendu eta aurkeztuko du podcasta, eta feminismoarekin lotutako askotariko gaiak landuko ditu, bi astean behin, asteazkenez. Webgunean ez ezik, Ivoox, Spotify, Apple Podctasts eta Google Podcasts plataformetan ere entzun ahalko da.

BERRIAren Andoaingo (Gipuzkoa) erredakzioan sortu zen podcast feminista bat egiteko ideia. Galardik azaldu duenez, egunkariaren gogoeta prozesuaren erdian hasi ziren gaia plazaratzen: «Konturatu ginen multimedia formatu desberdinei eman behar geniela lekua, eta, bestalde, BERRIAk esplizituki feminista izan behar zuela. Talde txiki bat elkartu ginen. Etxeak bazuen gogoa horrelako formatu bat sortzeko, eta denen artean osatu dugu». Podcastaren gai zentralari buruzko ilustrazio bat egingo du bi astean behin Araiz Mesanzak.

Galardik feminismoarekin lotutako makina bat gai landu izan du BERRIAn eta Klitto atarian. Horrez gain, bere doktore tesian euskal gatazka ikuspegi feminista batetik ari da ikertzen. «Ikuspegi feministatik hainbat gai lantzea interesatzen zaidanez, gustura hartu dut erronka», esan du Galardik.

Podcastaren atal bakoitzak 25-30 minutu inguruan iraungo du. Lehenbizi, sarrera bat egingo dute gai nagusia kokatzeko. Gero, elkarrizketa edo mahai inguru nagusia etorriko da. Jarraian, umorezko atal bat iritsiko da.   

Ramoni eta Lohitzune

Berria telebistaren Korriklika saiorako, Beatriz Egizabal eta Intza Alkain aktoreek Ramoni eta Lohitzune pertsonaiak sortu zituzten udaberrian. Korrikarekin lotutako esketxak egin zituzten orduan, eta, orain, feminismoaren bueltan arituko dira umorea egiten. «Ironia» erabiliko dutela iragarri dute.

Umorezko tartearen ostean, beste elkarrizketa labur bat egingo dute. «Eta, amaitzeko, BERRIAko kazetari baten analisia izango da entzungai», iragarri du Galardik. «Egunkariaren produktu berri bat da, eta kazetari feminista guztiei egin nahi diegu lekua».
Estreinako atalean, Josebe Iturrioz elkarrizketatuko du Galardik. Hilaren 25a Indarkeria Matxistaren Aurkako Eguna da, eta gai horri helduko diote. Maite Asensio BERRIAko kazetariak, berriz, gaiaz igandean argitaratuko den erreportaje luzearen aurrerapena egingo du.

Podcasteko gidariak iragarri du elkarrizketak mamiz beteta egongo direla. «Aldi berean, saiatuko gara pedagogikoak eta ulerterrazak izaten. Gertuko tonu batean arituko gara; saiatuko gara giro gozo bat sortzen elkarrizketan gauden bion artean». 

Sareko BERRIAzalea:

Udazkenean, BERRIAlagun egiteko pausoa eman dezazun, eskaintza bat egin nahi dizu BERRIAk. Herri baten kulturaren plaza da BERRIA. Kultur egitasmo, dinamika eta ekitaldi anitzen erakustoki. Euskal kulturaren inguruko informazioaren plaza handia. Azaroan eta abenduan, Euskaraldiak, Bertsolari Txapelketa Nagusiak eta Durangoko azokak hartuko dituzte, besteak beste, BERRIAren orrietako asko, paperean eta webgunean.

Albiste asko irakurriko dituzu, segur aski webgune honetan bertan. Eta eskari bat egin nahi dizugu: har ezazu konpromisoa irakurtzen duzunarekin. Irakurleen babes ekonomikoa funtsezkoa da BERRIAren etorkizuna ziurtatzeko.

Albiste gehiago

 ©MONIKA DEL VALLE / FOKU

«Euskarak bere lekua topatu beharko du krisi ekologikoan»

Amaia Igartua Aristondo

Krisiak eragin ditzakeen gizarte aldaketetara egokitu beharko du euskarak, Igeregiren arabera. Egoera gorabehera, euskalgintza eta ekologismoa batu daitezke; egun, ordea, «bakoitzak bere bidea du».
Sukaldari bat, bere etxean, zopa prestatzen. ©BERRIA

Salda badago

Enekoitz Telleria Sarriegi

Zopa giroa izaten da negukoa: gozatzen duelako barrena eta eztitzen duelako aldartea. Baina hori baino gehiago ere bada zopa: oinarrizko jaki bat da, unibertsal bihurtu dena, eta norbere kulturaren adierazle ere badena. Jendeak, ordea, egiten du oraindik zoparik etxean?
 ©IKER MARKINEZ

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...