Albistea entzun

Ogasuna

Iruzurraren aurkako tiketa

Foru ogasunek enpresen eta autonomoen fakturazio sistema digitalizatuko dute, kontrola indartzeko. 2021ean jarriko dute martxan Ticket Bai egitasmoa. Bizkaiak aitorpen proposamenak igorriko ditu sistemako datuetan oinarrituta.

Jose Maria Iruarrizagak Bizkaiko Ogasun eta Finantza diputatua eta  Iñaki Alonso Ogasuneko zuzendaria, tiket berriekin
Jose Maria Iruarrizagak Bizkaiko Ogasun eta Finantza diputatua eta Iñaki Alonso Ogasuneko zuzendaria, tiket berriekin / Berria

Imanol Magro Eizmendi - Jokin Sagarzazu -

2019ko abenduak 17 09:43

Enpresen eta autonomoen jardunaren gaineko kontrol handiagoa izango dute Arabako, Bizkaiko eta Gipuzkoako ogasunek. Ticket Bai deituriko ordainagiri sistema digitala 2021ean jarriko dute indarrean Bizkaian eta Gipuzkoan, eta horren bidez jakin ahal izango dute fakturak zuzenak diren eta saltzaileek deklaratu dituzten ala ez. Modu horretan egin nahi diote aurre zerga iruzurrari. Bizkaian 100.000 enpresa eta autonomori eragingo die; Gipuzkoan, 54.000ri.

Bilbon eta Donostian aurkeztu dute egitasmoa. Hiru foru aldundiek eta Eusko Jaurlaritzak elkarlanean bultzatu dute, baina lurralde bakoitzak bere berezitasunak izango ditu, eta denbora ezberdinetan gauzatuko du; Bizkaian, 2021ean egongo da indarrean; Gipuzkoan, 2021ean hasiko dira, 1.000 zergadunekin; eta guztiekin, 2022aren amaieran. Araban datozen asteetan emango dituzte azalpenak.

Bi urte pasatu dira edozein erosketa egitean faktura emateko betebeharra indarrean denetik. Bizkaiko Ogasunaren kalkuluen arabera, egun salmenten %20 ez dira deklaratzen. «Bost fakturetatik bat borratu egiten da eta B kutxara doa», azaldu du Jose Maria Iraurrizaga Bizkaiko Ogasun eta Finantza diputatuak. Horri gehitu behar zaizkio iruzurrak egiteko beste moduak: bigarren kontabilitate bat egin dezaketen softwareak, esaterako. «Sistema honi esker, bermatzen dugu erregistro informatikoen egiazkotasuna, osotasuna, trazabilitatea eta horiek aldatu ez izatea; hau da, behin igorri ostean, fakturak ezingo direla aldatu edo borratu ziurtatuko dugu», azaldu du Jabier Larrañaga Gipuzkoako Ogasun diputatuak.

Sistema berrira egokitzeko, inbertsioak egin beharko dituzte: Interneterako konexioa, softwarea erosi edo eguneratu, inprimagailuak... Gastu horiei aurre egiteko,ogasunek zerga pizgarriak edo laguntzak eskaini dituzte. Bizkaiak inbertsio horien %30 itzuliko du aitorpenetan. «Isun zorrotzak» ezarriko ditu, halaber: adibidez, Ticket Bai softwarea falta izanez gero, 20.000 eurokoa, eta agiriak deusezteagatik, 40.000koa, gutxienez.

Gipuzkoak oraindik ez du jakinarazi halakorik. Ostegunean emango ditu zehaztasun gehiago ogasunaren webgunean, sistema martxan jartzeko enpresariek beharrezkoak izango dituzten bitartekoen inguruan eta egutegiari buruz.

Zirkulua ixten

Bizkaian aurrerago doaz, eta egitasmoak ekarriko duen beste berrikuntza baten berri eman dute. Ogasunek Ticket Bai sistema baliatuko dute BEZaren, PFEZaren eta sozietate zergaren aitorpen proposamenak egiteko eta enpresa eta autonomoei eta igortzeko. Gipuzkoan ere hala egiteko asmoa dute, baina oraindik ez dute zehaztu nola. Bizkaian Batuz izena jarri diote egitasmo horri, eta 2021ean hasiko dira, baina, nahi dutenek, 2020ko uztailaren 1etik erabili ahal izango dute.

Horretarako, baina, ordainagiri elektronikoa ez da aski izango; ikerketaren zirkulua ixteko enpresek eta autonomoek euren kontuak ezagutarazi beharko dituzte. 2021etik aurrera autonomoek fakturazio 140 eredua delakoa hiru hilabetean behin aurkeztu beharko dute ogasunaren egoitza elektronikoan. 140 eredua kontu liburu digitala da: erosketak, salmentak, BEZak jasotzen ditu... eta Bizkaiak 2014an ezarri zuen —Gipuzkoan ez dago halakorik—. Egun, urtean behin bidali behar dute bakarrik, eta ez da beharrezkoa aldundiaren egoitza elektronikoan aurkeztea.

Enpresek, berriz, 240 eredua erabili beharko dute. Autonomoen 140 ereduaren antzekoa da, eta hor agertzen dira enpresek egiten dituzten ariketa guztiak. 2021eko urtarriletik aurrera derrigorrezkoa izango da, eta enpresek egunero, hilabetero edo hiru hilabetean behin bidali beharko diote aldundiari.

Nola funtzionatuko du ‘Ticket bai’ egitasmoak?

Pertsona batek produktu edo zerbitzuren bat erosten duenean Bizkaiko edo Gipuzkoako saltokiren batean, fakturazio programak fitxategi bat sortuko du, eta horretan jasoko da jardueraren kontrolarentzako beharrezkoa den zerga informazio guztia. Gipuzkoan, ogasunarekin konektatuta dago sistema, eta, beraz, dokumentu hori foru erakundera igorriko da salmentaren ordainagiria atera bezain pronto. Bizkaian, enpresek zein autonomoek artxibo horiek igorri beharko dituzte beste informazio batzuekin batera, hiru-lau hilabetero, gutxi gorabehera.

Bezeroak, halaber, jasoko duen ordainagirian ikusi ahal izango du salerosketaren informazioa ondo igorrita dagoela ogasunera, fakturan dagoen QR kode baten bidez.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

LABen elkarretaratzea Donostian, lan ikuskaritzak salatutako tabernaren aurrean ©Gotzon Aranburu (Foku)

Ostalaritzako «lan esplotazioa» salatu du LABek

Berria

Sindikatuak elkarretaratze bat egingo du Donostian atxilotutako enpresaburuen jatetxe baten aurrean.

Mondragon korporazioaren egoitza nagusia, Arrasaten. ©Mondragon Taldea

Mondragonen industria arloa %15 handitu zen iaz, Ulma eta Orona kontuan hartu gabe

Imanol Magro Eizmendi

Taldearen industria arloak 4.800 milioi euroko fakturazioa izan zuen, ekipamenduei eta makina-erremintari esker batez ere. «Egoera onean gaude», laburbildu du Uzinek.

 ©Joxean Apeztegia

Nafarroako ekonomia %4,3 hazi zen 2022. urtean

Iker Aranburu

Kontsumoak bultzatuta, barne produktu gordinak gora egin du berriro urteko azken hiruhilekoan, %0,8 hain zuzen ere. Elma Saiz Ekonomia kontseilariak baztertu egin atzeraldia, baina 2023 hasiera motela espero du.

Zamaketariak eta portuko beste langileak Baionako portua blokeatzen, atzo, Tarnosen. ©PATXI BELTZAIZ

Erretreten erreformaren aurkakoek Baionako portua blokeatu dute

Iker Aranburu

Erretreta gibelatzeko proiektuari buruzko eztabaida astelehenean hasiko da Frantziako Asanblean

Kinka buletina

Klima larrialdiari eta ingurumenari buruzko azken berriak zabaltzen dituen buletina.

Iruzkinak kargatzen...

Izan BERRIAlaguna

Zure babes ekonomikoa ezinbestekoa zaigu euskarazko kazetaritza independente eta kalitatezkoa egiten segitzeko.