Araba, Bizkaia edo Gipuzkoa bisitatu duten turisten kopurua %3,6 hazi da 2019an

Araba, Bizkaia eta Gipuzkoa bisitatu zuten turisten kopuruak gora egin zuen 2019an. Eustatek argitaratutako datuen arabera, 3.441.967 lagun izan ziren hiru lurraldeetako batean joan den urtean: 2018an baino %3,6 gehiago. Modu berean, gora egin zuen EAEko ostatuetan turistek igarotako gauen kopuruak ere: 7.021.938 erregistratu ziren, aurreko urtean baino %3,3 gehiago.

Hazkundea, ordea, ez da orekatua izan hiru herrialdeetan. Hiruetatik bisitari gehien jaso zuena Bizkaia da (%46,9), eta, bertan, %3,9 hazi ziren sarrerak. Hazkunde handiena, berriz, Gipuzkoak izan zuen; 2018an baino %5,6 bisitari gehiago jaso zituen, eta hiru lurraldeetako batera datozen bidaiarien %39,7 joaten da bertara. Araban, bestalde, behera egin dute zenbakiek: %2,9 murriztu da lurraldea bisitatu dutenen kopurua.

Bisitariak jasotzen dituzten establezimenduen artean, apartamentu turistikoek gorakada izan dute azken urteetan. Joera hori baieztatu egin dute Eustaten datuek ere: gisa honetako apartamentuek 89.986 pertsona jaso zituzten 2019an, 2018an baino %13,5 gehiago. Agroturismoek eta landetxeek, berriz, behera egin dute: 167.007 lagun jaso zituzten, aurreko urtean baino %3,1 gutxiago.

Prezioak eta urtaroak

Araba, Bizkai edo Gipuzkoako ostaturen batean gaua igarotzeko 93,4 euro ordaindu behar izan ziren, batez beste; 2018an baino %3,2 garestiago. Lurralderik merkeena Araba izan zen (72,4 euro eguneko); jarraian, Bizkaia (85,8 euro); eta garestiena, Gipuzkoa (109,7 euro).

Turismoak nagusiki udako hilabeteetan eragiten du EAEn, baina urtaro horretatik kanpoko turismoak ere gorakada izan du: azken hiru urteetan, %12koa —%6 hazi da udako turismoa—.