Noiz sortua: 2020-03-26 12:36:29

Aurreikuspenak

Munduko Merkataritza Erakundeak dio 2008ko krisia baino larriagoa datorrela

Roberto Azevedo MMEko zuzendariaren arabera, nazioarteko kolaborazioa eta merkatu irekiak ezinbestekoak izango dira koronabirusak sorrarazi duen krisiari aurre egiteko.

Hego Koreako burtsako langile bat maskara jarrita lanean.
Hego Koreako burtsako langile bat maskara jarrita lanean. YONHAP / EFE Tamaina handiagoan ikusi

Xabier Martin -

2020ko martxoak 26

Osasun krisia milioika pertsonaren bizitza arriskuan jartzen ari da mundu zabalean, baina, COVID-19a mendean hartu ondoren ere, milioika pertsonak bizitza okertuko dien krisi ekonomiko larri baten mende segituko dute. Horrela ohartarazi du Munduko Merkataritza Erakundeak gaur. Roberto Azevedok garbi esan du jadanik hasia dela 2008ko Atzeraldi Handia baino krisi ekonomiko larriago bat, eta munduko herrialdeek prestatzen hasi behar dutela agertoki berri horretan krisiari aurre egiteko. Azevedok nazioarteko kolaborazioa eta merkatu irekiak eskatu ditu, AEBek eragin duten gerra komertzialari erreparatuz lerro artean. «Ez dago laguntzarik behar ez duen herrialderik», esan du; «azken aurreikuspenek erakusten dute atzeraldi handi bat datorrela, eta enplegu asko galduko dela. 2008ko finantza krisiak eragindako enplegu galera hura baino handiagoa izango da». Azevedok bere etxean grabatu du mezua, eta MMEren webgunean jarri dute.

Mundu osoari helarazitako mezu ezkor horrek garbi utzi du agertokirik okerrenerako prestatzen hasi behar dutela Europako Batasuneko kideek. «Pandemiak gogor joko ditu ekonomia, komertzioa, enpleguak eta ongizatea». Azevedok aitortu du herrialde asko pizgarri fiskalak martxan jartzen ari direla, eta diru politika aldatzen, alegia, atzeraldiari aurre egiteko «defentsak» ezartzen, baina bada egin beharreko beste zerbait ere, MMEko buruaren ustez: «Pandemiari erantzun global bat eman».

Historiak ez du barkatuko

«Ez dago inolako laguntzarik gabe aurrera egingo duen herrialderik, nahiz eta oso boteretsua edo oso aurreratua izan», esan du Azevedok. Harentzat, merkataritzak ematen dio bide ekoizpen eraginkorrari, eta ondasunen eta oinarrizko zerbitzuen hornidura bermatzen, «adibidez, ekipamendu medikoa, janaria eta energia».

AEBetako eta Txinako ekonomia erraldoiak merkataritza gerran aritu dira azken urteetan, eta muga zergak ezarri dizkiete elkarri. Europara ere iritsi dira Donald Trumpen protekzionismoaren ondorioak. Orain, berriz, protekzionismo horrek beste oldarraldi bat dauka medikuntza produktuei dagokienez. «Osasun krisia bukatzen denean, merkataritza izango da elkarri laguntzeko modua; historiak ez digu barkatuko, eta ez du ahaztuko porrot egiten badugu ahulenak laguntzeko saioan, dauden lekuan daudela». 

Goizeko buletina

BERRIAren papereko edizioaren gai nagusiak biltzen ditu egunero (astelehenetan salbu). Goizean goiz iristen da zure posta elektronikora.

Albiste gehiago

Koronabirusaren azken datuak

Koronabirusaren azken datuak

Berria

Euskal Herrian 13.406 gaixok eman dute positibo koronabirusaren proba eginda. 905 hil dira. COVID-19 gaitza izandako 4.972 pertsonari eman diete alta. Grafikoak, albiste barruan.

Diputatuak saioren hasieran, minutu bateko isilunean. / ©Mariscal, EFE

Alarma egoera luzatzea onartu du Espainiako Kongresuak

Berria

EAJk iragarri du bilera horretan egongo dela. EH Bildu, berriz, ez da joango. Konfinamenduan apirilaren 26ra arte luzatu dute Hegoaldean.

Gasteizko farmazia bat. / ©Endika Portillo, Foku

Egun beltzenetan bigarrena izan da atzokoa, hildako kopuruari dagokionez

Ekhi Erremundegi Beloki - Ane Eslava

Gutxienez 59 pertsona hil dira Euskal Herrian azken 24 orduetan koronabirusak jota. 900 hildakoen langa gainditu da. 462 positibo gehiago atzeman dituzte Hegoaldean.

350 diputatutik 43 joan dira Espainiako Kogresura ©mariscal / EFE

EAJk atea ireki dio Sanchezek proposatutako itunean parte hartzeari; EH Bildu ez da joango

Irati Urdalleta Lete

Apirilaren 26ra arte luzatu dute alarma egoera, eta Sanchezek aurreratu du uste duela hamabost egun barru berriro alarma dekretua luzatu beharko duela

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna