Ez da usaian bezalakoa izan aurtengo maiatzaren lehena: karrikara atera gabe eta etxetik ospatu dute langileek gaurkoan, M1 Etxetik dinamikaren baitan. Ipar Euskal Herriko hainbat eragilek bultzatu dute «manifestazio alai, aldarrikatzaile eta konfinatua». CGT eta LAB sindikatuek, Aitzina gazte mugimenduak, Bizi mugimendu altermundialistak eta EBA kolektibo feministak antolatu dute ekimena. Goizeko 11:50tan balkoietara atera dira hainbat lekutan, bakoitzak bere aldarriak zintzilikatu ditu leihotik, eta Bella Ciao kantua entzun dute ordu berean. Sare sozialetan bideo eta argazkiak partekatzera gonbidatu dituzte parte hartzaileak.
Eñaut Aramendi LABeko kideak mezu hau zabaldu du sare sozialetan: «Argi dugu, heldu diren asteetan gure enpresetan borrokatu eta antolatu beharko dugu. Patronalak krisi sanitario, ekonomiko eta soziala langileei pagarazi nahi die. Onartezina da. Bizita erdigunean jarri behar dugu». Aramendik langileei dei egin die «gaurko leihoko aldarrikapenak, bihar karriketara» eramateko.
📹2020ko MAIATZAREN LEHENA : BORROKA EGUNA!
— LAB IEH (@LAB_ieh) May 1, 2020
🗣ï¸Â@AramendiEnaut : "borrokan segitzea inoiz baino gehiago garrantzitsua da. Gaur lehioetan jarriko ditugun aldarrikapenak bihar karrikara eraman beharko ditugu!"#M1Etxetik#BizitzaErdigunera#MaiatzarenLehena2020pic.twitter.com/6Kol7twExo
EH Baiko kideek Frantziako Gobernuaren joera salatu, eta, onartezintzat jo dute krisi sanitarioak lan eskubideen arloan izandako eragina. «Egoeraz baliatu dira lan kodean zein eskubide sozialei murrizketa gehiago inposatzeko», salatu dute. Osasun krisiaren ondoko egunak izan dituzte gogoan; «mobilizazio eta borrokarako» tartea ireki duelakoan. «Sistema kapitalistaren logikatik» urruntzeko gogoeta eramatea beharrezkotzat jo dute, eta gizarte «justuago baten alde» egitera deitu dute. «Euskal Herrian ditugun alternatiba ainitzek jendarte justuagoa osatzen dutela, gure eskura eta gure ingurumena errespetatuz. Kapitalismoaren kontrako zentzura doazen aterabideak dira horiek», esan dute.
Bizi mugimenduak ere, aldarriak sare sozialetara plazaratu ditu: «Klima, langileen eskubideak eta zerbitzu publikoak suntsitzen segitzen duten egitasmo guzien kontra ihardukitzera dei egiten dugu, eta Ondoko Eguna eraikitzeko borondate deliberatua dugu».
