Espainiako Lan Zuzendaritza Orokorrak bere irizpideak plazaratu ditu argitzeko nola jokatu behar den datozen asteetan indarrean dauden erregulazio dosierrekin. Azaldu duenez, COVID-19arekin lotutako erregulazio txostenetako «ezinbesteko arrazoirako kausa objektiboak» une bakoitzean erabakitzen dira osasun publikoaren arabera. Ondorioz, erregulazio dosierrekin neurri desberdinak ezar daitezke« mailakako eta bereizitako intentsitatez eta graduazioz».
Beraz, enpresak joan daitezke kontratuen eteteak edo murrizketak bertan behera uzten edo moldatzen, beti ere gobernuaren arauen eraginaren arabera, hots, ezinbestekotasun arrazoiengatik baldintzatuta jarraitzen badute.
Adibidez, gobernuak sektore jakinen batean jende edo bezero kopurua mugatuta badauka, arlo horretako enpresek «etete eta murrizketei uko egin diezaiekete erabat edo partzialki, langile talde osoan edo zati batean, eta neurri progresiboan, ezinbestekotasun arrazoiari lotutako kausak desagertzen doazen heinean».
Era berean, Lan zuzendaritzaren arabera, «posible izango da aurrez aurkeztutako etete neurria aldatzea, eta lanaldien murrizketarako trantsizioa erraztea, zeinak eragin ekonomiko txikiagoa duten langileentzat, eta ahalbidetzen duen aurre egitea produktu eta zerbitzuen eskariaren eta eskaintzaren mailakako hazkundeari».
«Egon daitezela lasai»
Yolanda Diaz Lan ministroak hori berretsi du gaur bertan, soilik oraingoz partzialki zabaldu dezaketen taberna eta beste negozioei buruz galdetu diotenean. «Egon daitezela lasai, mekanismoak jarraitzen duelako, nahiz eta haiek ateak zabaldu».
Aldiz, gobernuaren neurriek baldintzatuta egon gabe, ezinbesteko arrazoiaren faltan, euren kabuz eta borondatez jarduerari partzialki ekiten dioten enpresek ez dute aukera hori izango.
Prozedura ahalik eta sinpleena izatea nahi du Lan Zuzendaritzak. Jarduera betean hasi nahi duen enpresak nahikoa izango du lan agintaritzari jakinaraztea uko egiten diola neurriari, eta prestazioen kudeatzaileari enplegatu bakoitzaren egoera zehatzaren berri ematea. Diaz ministroak gehitu du erregulazioan jarraitu baina dosierretik langileak ateratzen dituen enpresak horren berri SEPEri eman besterik ez duela egin behar.
Alarma egoera
Edonola ere, hurrengo egunetan zehaztasun gehiago iritsi beharko dira erregulazio dosierren inguruan. Lan ministerioa patronalarekin eta sindikatuekin negoziatzen ari da erabakitzeko zer gertatzen den erregulazioekin behin alarma egoera amaitzen denean, izan ere, egungo araudiarekin kasu horretan ezinbesteko arrazoiengatiko erregulazioak bertan behera geldituko lirateke modu automatikoan.
Normalean SEPEren sariak hilaren 10an kobratu ohi dira, baina erregulazio dosier hauetan dauden langileei oraingoan hilaren 3ra —igande honetara— aurreratuko zaie prestazioa, gobernuak banku gehienekin egin duen hitzarmenari esker.
