Viktor Babariko enpresari eta oposizioko kidearen abokatu da Martin Znak, eta bera ere Koordinazio Kontseiluko kidea da. Haren gertuko iturriek zabaldu dutenez, bideo bidezko bilera bat zuen goizeko lehen orduan, baina ez zen azaldu. Hori dela eta, Babarikoren alderdiko eledun Gleb Glevovek telefonoz deitu zion. «Bisitan etorri direla dirudi», esan zion Znakek, eta gero komunikazioa moztu zuen. Handik gutxira, maskarak zioen mezu bat jaso zuen Glevovek telefonoan.
Koordinazio Kontseiluko zazpi kideetatik sei preso edo erbestean daude. Soilik Svetlana Aleksievitx Nobel sariduna geratzen da aske. Atzo jakinarazi zuten Maria Kolesnikova Ukrainara kanporatzen ahalegindu zirela Bielorrusiako segurtasun indarrak, baina oposizioko kideak pasaportea apurtu zuen. Ondorioz, ezin izan zuten mugaz bestaldera bidali, eta Bielorrusian bertan atxilotu zuten.
Svetlana Tsikhanovskaia oposizioko buruak babesa eskatu dio Errusiari. «Hauteskundeetako emaitza ofizialak zentzugabeak dira. Lukaxenko agintean baldin badago manifestarien aurkako indarkeriari esker da», salatu du Tsikhanovskaiak.
