Istripu larria gertatu zen atzo arratsaldean Lapuebla de Labarcan (Araba), Arabako Errioxan, non mahats bilketarako garaian baitaude. Upategi batean lanean ari ziren bi langile hil ziren. Bietako bat mahatsez betetako andel batera erori zen. Bestea hari laguntzen ahalegindu zen, baina hura ere jausi egin zen, eta biak zendu dira. Kontuan izan behar da ardoaren hartzidura prozesuan erabiltzen diren gasak toxikoak direla.
Ertzaintzak eta Osalanek ikerketa bat abiatu dute gertatutakoa argitzeko. Halere, Eusko Jaurlaritzako Segurtasun Sailak albiste agentziei berria baieztatu die, baina zehaztapen gehiagorik ez du eman ezbeharraren inguruan. Adierazi du istripua 19:40 aldera gertatu zela, bi langileak Espada Ojeda upategian lanean ari zirela. Langile batek 53 urte zituen, eta besteak, berriz, 56. Horietako bat Daniel Espada herriko alkate ohia zen, eta bestea, haren senide bat.
Sindikatuek egiten duten zenbaketaren arabera, atzo gertatu zena ere aintzat hartuta, aurten denera 52 langile hil dira Euskal Herrian lan istripuen ondorioz. LAB sindikatuak erakunde publikoei eta patronalari eskatu die lan segurtasunari lehentasuna emateko.