Udazkeneko iragarpenak egin ditu Europako Batzordeak. Horien arabera, euroguneko ekonomia %7,8 txikituko da aurten, uztailean kalkulatutakoa baino ia puntu bat gutxiago (-%8,7). Udako suspertzea uste baino handiagoa izan zela dio Bruselak, baina ez du jarraipenik izan. «Europaren suspertzea eten egin da COVID-19 kasuak berriz agertzearen ondorioz», azaldu du Paolo Gentiloni komisarioak.
Oro har, euroguneko eta Europako Batasuneko ekonomia aurten iragarritakoa baino gutxiago jaitsiko den arren, badira salbuespenak. Espainiaren iragarpena, esaterako. -%10,9tik -%12,4ra okertu du Bruselak. Estatukide handien artean, hark emango ditu daturik txarrenak. Italiaren BPGa %9,9 da jaistekoa, Frantziarena %9,4, Alemaniarena %5,6, eta Herbehereetakoa, berriz, %5,3.
Europako Batzordeak uste du ekonomiak gutxienez bi urte beharko dituela pandemiaren aurreko mailara itzultzeko. Horrela, eurogunean %4,2ko hazkundea iragarri du 2021ean, eta %3koa 2022an.