Koronabirus kasuek azkenaldian izandako gorakadaren ondorioz, Eusko Jaurlaritzako Osasun Sailak PCR probak egitera deitu ditu Basauriko (Bizkaia) eta Eibarko (Gipuzkoa) herritarrak. Zehazki, 13 eta 40 urte bitartekoek izanen dute aukera testa egiteko. Bi herrietan, positibo kopuruak nabarmen egin du gora azken egunetan. Zehazki, 100.000 biztanleko 611 kasu daude hamalau egunean Basaurin. Eibarren, berriz, 1.758koa da intzidentzia tasa.
Basaurin, Osakidetza bihar hasiko da herritarrei PCR probak egiten, arratsaldeko lauretan. Basauriko Erretiratuen Etxean eginen dituzte, Social antzokiaren alboan. Premiazkoa da aldez aurretik ordua galdegitea: herriko hiru osasun etxeetan eska daiteke. Osakidetzak jakinarazi duenez, baheketek bost egun iraunen dute gutxienez, eta, hala behar izanez gero, gehiago luzatuko dituzte.
Eibarren, astelehenetik ostiralera eginen dituzte birusa atzemateko probak, arratsaldez, Eibarko ospitalean. Aukerakoa da testa egitea, baina hala erabakitzen dutenek aldez aurretik eskatu beharko dute ordua, telefono bidez, biharko goizeko bederatzietatik aitzina. Osakidetzak jakinarazi duenez, proba egiten dutenei SMS bidez esanen zaie emaitza.
