Lucia Garciak salbatu du gaur Athletic, Lezaman. Bi gol sartu ditu aurrelariak, eta, horri esker, Bilboko taldeak Teneriferekin berdintzea lortu du.
Ligako buru da Tenerife, eta, atsedenaldirako, bi golen abantaila ateratzen zion Athletici. Lehen zatia, ordea, orekatu samarra izan da. Garciak lehen aukera argia izan du partida hasi eta ordu erdira. Baina 45. minutua hurbil zegoenean, Tenerifek bi kolpe jo ditu: Natalia Ramosek sartu du lehena, buruz,eta Allegra Poljakek bigarrena.
Markagailua aurka, bilbotarrak dena ematera atera dira bigarren zatian. Baina ez dute emaitzarik lortu hasieran. Lehen aukera argia Oihane Valdezatek jaurtitako baloi bat izan da, 71. minutuan, baina kanpora joan da, gutxigatik. Baina jokalariak akuilatzea lortu du aukera horrek, eta Garciak bilbotarren lehena sartu du, 77. minutuan, Eunate Arraizak emandako baloi bati esker. Berdinketa, berriz, luzapenean heldu da.
