Espainiako Gobernuak nahi zuen moduan utzi ditu lotuta enplegua aldi baterako erregulatzeko espedienteak maiatzaren 31 arte: aldaketa handirik egin gabe. Halaber, akordio baten aurrekoa lortu du autonomoen elkarteekin, jarduerarik gabe geratu diren langile autonomoei sari berezia beste lau hilabetez luzatzeko. Baina arazo gehiago izan ditzake esku artean dituen beste gaiekin, eta, batez ere, pentsioen erreformarekin eta azken lan erreformen moldaketarekin. CCOO eta UGT sindikatuak ez daude gustura entzuten ari direnarekin, eta mobilizazioetara deitu dute otsailaren 11rako.
Arratsaldearen amaieran iritsi da akordioa autonomoen elkarteekin. Berritasun batzuk baditu. Aurretik ez bezala, ez da beharrezkoa izango lehen olatuan saria jaso izana orain laguntza eskatzeko. Gainera, saria eskatzeko nahikoa izango da jarduera %50 gutxitzea —%75 gutxitzea eskatzen du orain arauak, —, eta Gizarte Segurantzaren kuotaren igoera atzeratu egingo dute, gutxienez maiatzaren 31 arte.
Erregulazioei dagokienez, patronal eta sindikatu handien babesa bilatzen zuen Yolanda Diaz ministroak, eta lortu egin du. CEOE patronalaren erantzuna zen zalantzarik handiena. Enpresaburuen elkarteak begi onez hartu ditu aldi baterako erregulazioak, aukera ematen dietelako larri dabiltzan enpresetan lan taldea arintzeko eta kostuaren zatirik handiena estatuaren esku uzteko.
Baina oraingo araudiaren puntu bat aldatu nahian dabiltza aspalditik: aldi baterako erregulazio bat eskatzen duen enpresak ezingo duela langilerik kaleratu sei hilabeteko epean. Berez, badu aukera, baina kasu horretan, aurreztutako Gizarte Segurantzaren kontribuzio guztiak itzuli beharko lituzke.
Ikusita Espainiako Gobernuak ez zuela puntu horretan amore emango, CEOEk estrategia aldatu zuen, eta eskatu zuen soilik kalera doan langilearen kontribuzioak itzultzeko aukera jartzeko. Hori ere lortu ez duen arren, CEOEko buruzagitzak ahobatezko babesa eman zion gaur goizean aldi baterako erregulazioen araudi berrituari, enpresen gastua gutxituko duen proposamen bat egin baitu gobernuak: langileak aldi baterako erregulazio mota batetik bestera aldatzeko ez da izapide burokratikorik egin beharko, automatikoki onartuko baititu administrazioak. Aldi baterako erregulazioak luzatzeko oztoporik ez da izango.
Sindikatuen kezkap>
CCOOk eta UGTk, berriz, iluntzean eman zioten oniritzia testuari, azken puntu batzuk argitu ondoren. Problema, berez, gobernuak mahai gainean dituen beste gaiekin dute sindikatu horiek. Batetik, oraindik ez dute etsi lanbide arteko gutxieneko soldata igotzeko asmoetan.
Soka luzeagokoak dira lan erreformarena eta pentsioena, eta horietan eztabaida dago Espainiako Gobernuaren barruan, Unidas Podemosen eta PSOEren artean, baina baita azken horren barruan ere. Horregatik eta gaiak gizarte elkarrizketaren mahaira eraman nahi dituelako, Madrilek zehaztasun handirik gabeko testuak bidali ditu Bruselara, Espainiak eta beste estatukideek EB Hurrengo Belaunaldiaren funtsaren dirua jasotzeko baldintzetako bat baita zintzilik dituzten erreforma batzuk abiatzea.
Madril ez omen da izan zirriborro orokorregiak bidali duen bakarra, Valdis Dombrovskis Europako Batzordeko lehendakariordeak testu zehatzagoak eskatu baitzizkien gobernuei, atzo.
Monteroren azalpenak
Maria Jesus Montero Ogasun ministroak argitu du pentsioei dagokien erreformaren testuan ez dela ageri pentsioaren kalkulua egiteko aintzat hartu beharreko kotizazio epea 25 urtetik 35era luzatzea. Escriva ministroaren proposamen horri ezezko borobila eman dio Unidas Podemosek, haren eskutik pentsioak %6 gutxituko direlakoan. Sindikatuak ere aurka daude, eta horren aurka borrokatuko dute negoziazioak hasten dituztenean.
Ez dago garbi 2012ko eta 2013ko lan erreformarekin zer gertatuko den. Monterok azaldu du erreforma horien «atalik kaltegarrienak» bertan behera utziko dituen promesa bidali duela Bruselara, hala agertzen zelako inbestidura itunean. Akordio horrek zioen«2012ko erreformak ostutako lan eskubideak» berreskuratuko zirela, eta baliogabetuko zuela enpresa itunen nagusitasuna sektoreko hitzarmenen gainean. Aldi baterako kontratuei mugak jartzea eta aurrerako eragina berreskuratzea dira itunak aipatzen dituen beste bi gai.
