Osakidetzako langileek txertatzeko prozesuaren inguruan izan dituzten «irregulartasunen» harira, ESK sindikatuak eskatu zuen EAEko Justizia Auzitegi Nagusian «kautelazko» neurri gisara lehen lerroko osasun langileen txertaketa lehenesteko, eta osasun sistemak eskura zituen txerto guztiak behargin horien txertaketara bideratzeko. Justiziak, ordea, ezezko erantzuna eman du: ez du aintzakotzat hartu eskakizun hori.
ESK-ren aburuz, Osakidetzak ez ditu bete laneko arriskuen prebentziorako araubideak; horregatik jo zuen auzitara. EAEko Justizia Auzitegi Nagusiak eman duen ebazpenaren arabera, ordea, ez dago arrazoibiderik esateko langileen esku ipini diren baliabideak ez direla «egokienak». Gainera, erantsi du sindikatuak ez dituela babesik gabe dauden langileen egoerak behar bezala «zehaztu», eta ez daudela, beraz, behar adina motibo eskakizuna aintzat hartzeko.
