Javier Landetak ordezkatuko du Luis Mari Elustondo Euskadiko Futbol Federazioaren presidente karguan. Landeta Koikili Lertxundiri nagusitu zaio gaur, Ipuruan egindako batzar nagusian. 86 boto jaso ditu presidente berriak, eta Koikilik, 29. Beste bat, berriz, txuria izan da. Beraz, Landetak eta haren lantaldeak gidatuko du Euskadiko Federazioa hurrengo lau urteetan.
«Harro gaude, batzarrak babesa eman baitigu. Gogor borrokatuko gara euskal futbolaren alde. Ez dago denbora galtzeko. Gure hauteskunde programa bete behar dugu. Gure ardura da», esan du irabazi berritan. Eskua luzatu dio Koikiliri. «Ideia guztiak ongi etorriak izango dira, guztiok helburu bera baitugu: euskal futbolarentzako onena».
«Adostasunetik» ofizialtasunaren aldeko urratsak egiteko prest azaldu da Landeta. Hain zuzen, zenbait lagunek ofizialtasunaren aldeko kontzentrazioa egin dute Ipuruaren sarreraren aurrean.
