Alstom frantsesaren eta Stadler suitzarraren artean banatuko dute Renferen kontratu handia, 2.726 milioi eurorena. CAF kanpoan geratu da, nahiz eta interes handia zuen enkargu hori lortzeko.
Albistea ez da guztiz berria; Beasainen (Gipuzkoa) egoitza duen ekoizleak abendutik zekien kanpoan geratuko zela. Aurretik etenda egon zen lehiaketa, Espainiako Talgok jarritako helegite batengatik, baina hori atzera bota, eta urte amaieran jakin zen Alstom eta Stadler izango zirela lehiakideak. Azkenean, bien artean banatuko dituzte lanak. Alstomek 152 tren egingo ditu, 1.447 milioiren truke, eta Stadlerrek beste 24 ekoitziko ditu, 998 milioirengatik.
Baina erabaki horrekin ez zaizkio ate guztiak itxi CAFi. Renfek beste bi kontratu esleitu behar ditu oraindik, eta horretan jarriak ditu itxaropenak. Bata, distantzia ertaineko 43 tren eta aldiriko beste 38 egiteko (hibridoak denak), eta bestea, abiadura handiko 40 tren buru egiteko. CAFek Castejonen (Nafarroa) duen plantan arreta handiz aztertzen ari dira prozesu hori, lantegi horren geroa horren menpe dagoelako hein handi batean.
