Albistea entzun

Sindikatuak

Bihar eramango dituzte epaitegira goizean Iruñean atxiloturiko sindikalistak

Atxilotuetako bat aske utzi dute goizean, eta gainerakoak bihar goizean pasako dira Fermin Otamendi epailearen aurretik. Sindikatuak jakinarazi duenez, garbitzaileen sektoreko protesta batekin daude lotuta atxiloketak.

LAB sindikatuak deituta elkarretaratzea egin dute Chinchilla kaleko Polizietxearen aurrean.
LAB sindikatuak deituta elkarretaratzea egin dute Chinchilla kaleko Polizietxearen aurrean. Iñigo Uriz / FOKU Tamaina handiagoan ikusi

Joxerra Senar - Paulo Ostolaza -

2021eko apirilak 20

LAB sindikatuak jakinarazi duenez, Espainiako Poliziak sindikatu horretako zazpi kide atxilotu ditu Iruñean gaur goizean, garbitzaileen sektoreko bi protestarekin erlazionatuta: CENen aurrean martxoaren 8an egindako protesta bat eta apirilaren 9an ISN enpresaren kamioi batera igo eta N-121 errepidea mozteagatik.. Atxilotuetako bat aske utzi dute. Gainerako bost atxilotuak «nekaturik» daudela adierazi diote abokatuari. Arratsaldean Iruñeko Udaltzaingoan izan dira deklarazioa hartzen eta bihar goizean pasako dira Fermin Otamendi Iruñeko 2. instrukzioko magistratuaren aurretik. Gaua ziegan pasako dute.

Imanol Karrera sindikatuko bozeramaileak adierazi duenez, ordea, gehiago izan zitezkeen atxilotuak, 11. Espainiako Poliziak hala adierazi dio sindikatuko abokatuari. Karrerak salatu du auzitegira joateko jakinarazpena bidali ordez atxilotu egin dituztela: «Ez da demokrazia batean egon behar lukeen prozedura».

Atxilotuetako bat Izaskun Juarez da, LABeko Iruñea-Pirinioetako idazkaria, eta, LABek BERRIAri baieztatu dionez, hura da aske geratu dena.

Goizeko 11k baino lehentxeago atxilotuetako batzuk polizia etxetik atera dituzte, eta autoetan sartu. LABen arabera, «pentsatzekoa da auzitegira eramateko» atera dituztela. Horietako bat da Imanol Salinas, LABen Zerbitzu Pribatuen federazioko kidea. Operazioa zabalik dagoela esatera mugatu da Espainiako Gobernu ordezkaritza..

Atxiloketen ondorioz, bertan behera utzi dute 11:00etan maiatzaren 1aren inguruan egitekoak ziren prentsaurrekoa, eta, horren ordez, atxiloketen inguruko adierazpenak egin ditu Karrerak. Poliziak identifikatu egin ditu komisariaren parean atxilotuak askatzea eskatzeko elkartu diren hogei lagun inguru. eta identifikatu ez dituztenak elkarretaratzetik aldendu dira, sindikatuak jakinarazi duenez. LABeko ordezkari batek agenteei adierazi die identifikazio plaka soinean eraman beharko luketela legez. Operazioburuak «errespetua» eskatu dio Karrerari, eta bozeramailea ere identifikatu dute.

Atxiloketen eragilea

LABek egindako bi ekintza dira atxiloketen eragilea. Bat, apirilaren 9an Beriainen (Nafarroa) egindakoa: Nafarroako garbiketa sektoreko langileentzat hitzarmen duin bat eskatzeko, garbiketa sektoreko bi langile ISN enpresako kamioi batera igo ziren eta N-121 errepidea trabatu zuten. Greba antolatua zuten apirilaren 13, 14, 15 eta 16rako. LABen arabera, hitzarmena blokeatzen duten enpresetako bat da ISN.

Beste ekintza CEN patronalaren egoitzan kontratazioko diskriminazioa salatzeko egindako bat da. Karrerak gaitzetsi egin du ekintza horien kriminalizazioa: «Greenpeacek ekintzak egiten ditu eta ez da ezer gertatzen, baina sindikatuek langileak ahalduntzean bai».

Bozeramailearen arabera, patronala Nafarroako garbitzaileen hitzarmena blokeatzen ari zen, eta hori salatzeko egin zuten ekintza garbitzaileek: «Euren eskubideen alde ari diren langileak atxilotzen dituzte, baina hitzarmena betetzen ari ez diren ISNko arduradunak ez».

Karrerak salatu duenez, ISN enpresako jabe Fermin Elizaldek kontratazio arloan egindako iruzurrengatik eta soldatak ez ordaintzeagatik salaketa ugari ditu: «Epaitegietan oso ezaguna da horregatik, baina epaileek ez dute ezer egiten lanean ematen den iruzurragatik eta diskriminazioagatik». Era berean, gaineratu du poliziek ez dutela ezer egiten CEN patronalaren aurka, nahiz eta sindikatuek lan istripuetan bere ardura salatu. Bozeramaileak salatu du operazioa propaganda izan dela, eta euren eskubideen aldeko langileen desmobilizazioa bilatu duela.

Garbiketa sektore hitzarmenaren testuinguruan eman da lan gatazka. Sektore prekarizatu eta feminizatua izaki, genero arrakala eta lan baldintza duinagoak aldarrikatu dituzte sindikatuek. Apirilaren 13tik 16ra bitartean, greba zegoen iragarrita, baina bezperan lan ituneko baldintzak hitzartu zituzten CCOO eta UGTk patronalarekin. Bi sindikatuon ordezkaritza %49koa da, eta LABek, ELAk eta Solidarik «deusen truke» langileak saltzea egotzi zieten sindikatuoi.  

Hasieran, sindikatuko kideek uste zuten atxiloketek Emakumeen Nazioarteko Eguneko protesta batekin ere bazutela lotura, baina gezurtatu egin dute uste hori.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

 ©AEGE ELKARTEA

«Argindar konpainien kontratu finkoak ez dira lehiakorrak»

Imanol Magro Eizmendi

Energia asko kontsumitzen duten enpresen ahotsa da Soto, eta uste du gasari ezarritako mugek arnasa eman diotela sektoreari. Hala ere, neurri gehiago nahi ditu, 2022. eta 2023. urteak malda gogorra izango direlakoan.
Ontzi bat Bilboko portuan sartzen. ©LUIS JAUREGIALTZO / FOKU

Gerrak ez ditu eragotzi kanpo salmentak: inoizko martxorik onena izan da

Jokin Sagarzazu

Esportazioak handitu dira, baina hori halako bi gehitu dira inportazioak, eta superabita uzkurtu da. Olio finduen eta tutuen salmentak hazi dira gehien
Emakume bat bitcoin-ak diru gisa onartzen dituen okindegi batean, Santa Tecla hirian (El Salvador).. ©Rodrigo Sura / Efe

Kriptodiruak: birtualak ez diren galerak

Iker Aranburu

Bitcoinen eta beste diru digitalen balioa amildu egin da, eta 'luna' izenekoa, berriz, desagertu. Inbertitzaileak arrisku handiko aktiboetatik alde egiten ari dira. El Salvador arriskuan jarri du erorialdiak, bitcoinen aldeko apustua egin baitu.

Zoru Klausulak Stopeko kideak, Donostiako auzitegian, 2015ean. ©Berria

Europak ebatzi du zoru klausula guztiak itzuli behar direla, abusua frogatzen bada

Jokin Sagarzazu

Espainiako Auzitegi Gorenak erabaki zuen 2013aren aurretik sinatutako hipoteka zutenei bakarrik itzuliko zitzaiela dirua

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...