Albistea entzun

Haurrak dituzten familiak eta pentsiodunak lehenetsiko ditu DSBE berriak

Erroldatze epea hiru urtetik bira gutxituko da adingabeak dituztenentzat. Bakarrik dauden pentsiodunek 893 euro jasotzea bermatu nahi da. Gogortu egingo dira lan eskaintza bat ez onartzearen ondorioak

Idoia Mendia sailburua, ostegun honetan eginiko aurkezpenean
Idoia Mendia sailburua, ostegun honetan eginiko aurkezpenean Irekia Tamaina handiagoan ikusi

Jokin Sagarzazu -

2021eko maiatzak 13 09:29

Eusko Jaurlaritzaren diru sarrerak bermatzeko errentaren (DSBE) erreformak hobetu egingo ditu pentsiodunentzako, guraso bakarreko familientzako eta adingabeak ardurapean dituztenentzako laguntzak. Halaber, errenta kobratzen duten pertsonen lan aktibazioa bultzatuko du. Idoia Mendia Lan eta Enplegu sailburuak lege egitasmoaren zirriborroa aurkeztu du ostegun honetan. Gaur egun, 55.000 pertsonak kobratzen dute DSBEa.

Testuak hainbat berritasun ditu. Hauek dira nagusiak: erroldatze epea hiru urtetik bira gutxitzea adingabeak dituzten familientzat; laguntzaren zati bat galtzeko aukera, osorik galdu beharrean, haurrak babesteko neurri gisa; baldintzak ez betetzegatik ezarritako ondorioak gogortzea, adibidez lan eskaintza bati uko egiten denean; eta errenta hilabete bateko epean jasotzen hasteko aukera.

Oraindik zirriborro bat da legearen erreforma, eta ekarpenetara irekita dago. Mendiak gogorarazi duenez, aurreko legealdian «posible izan ez zena» egin nahi dute orain. Lege egitasmo bat aurkeztu zuten orduan, baina, azken orduan, aurrera egitea zaila izango zela zela ikusita, bertan behera utzi zuten. Orain, gobernuak gehiengo osoa du legebiltzarrean.

Jaurlaritzaren nahia da lege berria datorren urteko udazkenean sartzea indarrean. Bien bitartean, Espainiako Gobernuak sortu duen bizitzeko gutxieneko errenta (426 eurokoa) DSBEan integratu beharko du.

Baldintzak

Erreformarako proiektu berriak DSBEa eskatzeko baldintza nagusiari eusten dio, hau da, hiru urtez erroldatuta egotea, baina berrikuntza bat du: adingabeak dituzten familientzat, hiru urtetik bira jaitsiko da. Halaber, ezabatu egingo da erroldatze baldintza «terrorismoaren biktima» izendatutakoentzat, eta atzerriko euskal gizataldeentzat edo euskal diasporako kideentzat.

Izapideak sinplifikatu egingo dira, eta laguntza eskatzen duen pertsonak erantzukizunpeko adierazpen bat ezarriko du dokumentuak aurrezteko. Horrekin, eskaera egin eta hurrengo hilabetean kobratuko ahal izango laguntza, epeak aurreratuta. Baina, deklarazioak faltsukeriarik badu, zehapena bi urtekoa izango da, eta tarte horretan ezingo da laguntzarik jaso.

Era berean, prozesua arintzeko, digitalizazioa bultzatuko da, baina beti egongo da aurrez-aurreko arreta Lanbiden. Horrekin, enplegu zerbitzuan egun dagoen lan karga arindu nahi dute, eta haren jarduna enplegu politika aktiboetara gehiago bideratu.

Egitasmoak jasotzen duen beste berritasun bat da laguntza mugarik gabe aitortuko dela, baina aldian aldiko kontrolekin. Horretarako, ikuskatzaile talde bat sortuko da, Lanbideko langileekin.

Kopuruak

Oro har, ez da aldaketa handirik aurreikusten kopuruetan. Handitu egingo da guraso bakarreko familiek, adingabeak ardurapean dituztenek eta pentsiodunek jasoko duten diru kopurua. Gainerakoen kasuan, oraingoen antzekoak izango dira. Etxebizitzarako laguntza osagarria desagertu egingo da.

Gaur egun, gehienez 706 euro jasotzen dituzte norbanakoek, 907 euro bi kideko familiek, eta 1.003 euro hirukoek eta gainerako familiek. Lege berriarekin, ardurapean pertsonaren bat (normalean adingaberen bat) dutenek osagarri bat jasoko dute: %50ekoa izango da laguntzaren titularrarentzat —aitarentzat edo amarentzat—, eta %30ekoa seme-alaba bakoitzeko.

Pentsiodunei dagokienez, berriz, haietako askok DSBEa jasotzen dute pentsioak osatzeko, bereziki alargunek. Bakarrik dauden pentsiodunek 893 euro jasotzea bermatu nahi da, egun baino 83 euro gehiago.

Lan aktibazioa

DSBEaren beste helburu nagusia da lan egiteko adinean dauden eta errenta kobratzen duten pertsonek enplegu bat lortzea. Horretarako, Lanbidek onuradunei gutxienez lan eskaintza bat edo prestakuntza jarduera bat eskaintzeko betebeharra izango du. Aldi berean, gogortu egingo dira lan eskaintza bat ez onartzearen ondorioak: horietako bati uko eginez gero, laguntza galduko da.

Lan bilaketa sustatzeko osagarrietan berrikuntza bat dago: lehen, bi urtera mugatuta zeuden laguntza horiek, eta, orain, mugagabe bihurtuko dira. Osagarri horiek kobratzen dituzte, adibidez, lanaldi erdiak egiten dituzten pertsonek. Horien bidez, lanaldi luzeagoen bilaketa bultzatu nahi da, haientzat errentagarriagoa izan dadin hori egitea DSBEa osagarri gisa jasotzea baino.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

Zamaketariak eta portuko beste langileak Baionako portua blokeatzen, atzo, Tarnosen. ©PATXI BELTZAIZ

Erretreten erreformaren aurkakoek Baionako portua blokeatu dute

Iker Aranburu

Erretreta gibelatzeko proiektuari buruzko eztabaida astelehenean hasiko da Frantziako Asanblean

LABek  elkarretaratzea egin zuen azaroan, Adegiren egoitzaren atarian. ©Jon Urbe / Foku

Lehen bilera Gipuzkoako metalgintzan

Irune Lasa

Sindikatuek langileen erosahalmena bermatzeko adinako soldata igoerak nahi dituzte.

Urteko azken hiruhilekoan 9.000 lanpostu galdu dira Hego Euskal Herrian

Urteko azken hiruhilekoan 9.000 lanpostu galdu dira Hego Euskal Herrian

Jokin Sagarzazu

Bereziki zerbitzuen sektorean nabaritu da: 22.700 langile gutxiago daude. Industriak eta eraikuntzak eutsi egin diote, eta enplegua sortzen jarraitu dute.

Kinka buletina

Klima larrialdiari eta ingurumenari buruzko azken berriak zabaltzen dituen buletina.

Iruzkinak kargatzen...