Europa mailako arrautza frijitu izoztuaren patentea bereganatu du Angulas Aguinaga enpresak. Itsas produktuen sektoretik at kaleratuko duen lehenengo ekoizkina izango da, eta enpresaren fakturazioa bikoiztea du helburu. Hain zuzen, 2020-2025eko plan estrategikoaren barnean dago operazio hau, eta plana bukatzerako 450 milioiko fakturazioa izatea espero dute. Enpresak, beste hainbat marka ere merkaturatzen ditu gaur egun: Krissia, La Gula del Norte, Aguinamar, Angulas Aguinaga Profesional, Royal eta Riunione.
Elikagaiak aldez aurretik prestatu eta horiek banatzeaz arduratzen den HORECA kanalarekin daukan lankidetza indartzeko ere balio izango du arrautza frijituaren aldeko apustuak. Izan ere, Ignacio Muñoz Calvo enpresako lehen zuzendariak azaldu duenez, sukalde handietako jarduera «errazagoa eta seguruagoa» egitea da produktuaren helburua. Horrez gain, arrautza frijituak eskaintzen duen moldakortasuna ere faktore garrantzitsu bat izan da produktua aukeratzeko orduan.
Arrautza frijitu izoztua... zertarako?
Hala ere, askok galdetuko diote beraien buruari zer zentzu daukan arrautza frijituak izozteak. Izan ere, produktua prestatzeko hiru aukera daude: mikrouhin-labean segundo batzuetan berotu, minutu batean zartaginean edo sei minutuz labean. Arrautza gordin bat frijitzeko, ordea, hiru bat minutu baino ez dira behar. Horregatik, etxean arrautza bat edo bi frijitzeko, produktua ez da oso erabilgarria, baina ostalaritzan, denbora asko aurreztu daiteke. Sukaldaritza kolektiboan, seiehun arrautza banaka frijitzeak denbora asko hartzen du, baina arrautza izoztuak erabiliz gero, nahi beste presta daitezke sei minutuan, labe industrialen bidez.
Elikagaien segurtasuna mantentzea ere ahalbidetzen du produktuak. Legeriaren arabera, jatetxe eta jantoki kolektiboetan zerbitzatzen diren arrautzak gutxienez 75 ºC-ra iritsi arte kozinatu behar dira, salmonella eta antzeko beste arazo mikrobiologiko batzuk eragozteko, eta, arrautza frijitu arruntak hala kozinatuz gero, gorringoa mamituko litzaieke. Beraz, hori saihesteko, produktuak pasteurizazio prozesu bat igaro behar du, kalterik egiten ez dutela ziurtatzeko. Arrautza frijitu izoztuaren kasuan, tenperatura leuna aplikatzen da denbora luzez, patogenoak kentzeko, gorringoa mamitu gabe. Hala ere, gorringoa ez da likido eran geratuko, lodiagoa izango da.
