Iaz bertan behera geratu ostean, aurten hilaren 31n egingo da Donostiako Klasikoa. Gaur aurkeztu dute ibilbidea, eta, duela bi urtekoarekin alderatuta, bi kilometro motzagoa izango da. Sei mendate izango ditu: hirugarren mailako bi, bigarren mailako hiru eta lehen mailako bat, Erlaitz. Ohi bezala, Orio eta Donostia arteko zatia erabakigarria izan daiteke, nahiz eta aurten bi kilometro gutxiago izango dituen ibilbideak azken zati horretan.
"Iazkoarekin alderatuta, aurten soilik behin pasatuko dira Murgildik, eta puntuagarria izango den mendate bat gutxiago izango du, ondorioz", esan dute antolatzaileek. Azaldu dute Igeldotik Oriora doan errepidearen egoera dela-eta erabaki dutela zati hori kentzea, txirrindularien segurtasuna ziurtatzeko. Tarteko helmugak Hondarribian eta Donostiako Bulebarreko lehen zeharkaldian egongo dira.
Remco Evenepoelek irabazi zuen azken klasikoa, 2019koa.
