Albistea entzun

Futbola

Lehen aldiz, goi mailako futbolari batek homosexuala dela adierazi du

Josh Cavallok, Australiako Adelaide Unitedeko erdilariak, sare sozialetan argitaratu duen bideo baten bidez egin du aitortza. Futbol amerikarreko jokalari batek ekainean esan zuen gaya dela lehen aldiz.

Josh Cavallo, gorri-urdinez, aurten, Adelaide Unitedekin neurketa bat jokatzen.
Josh Cavallo, gorri-urdinez, aurten, Adelaide Unitedekin neurketa bat jokatzen. @JoshCavallo Tamaina handiagoan ikusi

Paulo Ostolaza -

2021eko urriak 27 09:27

Kostata, baina goi mailako gizon futbolari batek esan du homosexuala dela. Josh Cavallo izena du, eta Australiako lehen mailan jokatzen duen Adelaide United taldeko erdilaria da. Sare sozialetan argitaratutako bideo hunkigarri baten bidez eman du bere sexualitatearen berri: «Futbolari profesionala naiz, eta gaya. Bidaia bat izan da honaino heltzea, baina oso zoriontsu nago armairutik irteteko erabakia hartu dudalako. Sei urte igaro ditut nire sexualitatearekin borrokan», adierazi du bideoan Cavallok.

Aitortu du lotsa ematen ziola homosexuala dela esateak, eta hori futbol profesionalarekin ezin uztartu ahal izateko beldurra zuela: «Txikitatik izan dudan amets bat bete ahal izateko, nor nintzen ezkutatzen nuen. Sekula ez zitzaidan posible iruditu futbolera jokatzea eta besteen tratu bera jasotzea», dio bideoan.

Azaldu duenez, betidanik onartu izan du sekula ezingo zuela bere sexualitateaz hitz egin, eta bere sentimenduak ezkutatzen ikasi du, «futbolari profesionalaren estereotipoan» sartzeko: «Futbolean jokatzea eta gaya izanda haztea sekula gurutzatu ez diren bi bide dira».

Cavallok argi du ez dela goi mailako futbolari homosexual bakarra, eta esan du haiek euren sexualitatea bizitzeko duten modua aldatzea dela bere helburua. Adelaide Unitedek eta bere taldekideek babes osoa erakutsi diote.

Euskal Herriko hainbat futbol taldek zoriondu egin dute jokalaria.

«Zutaz harro, Josh», idatzi du Athletickek, ingelesez, Twitter sare sozialean, eta eskerrak eman dizkio futbolariari, euskaraz.

Proud hitza (harro, ingelesez) ostadar banderen artean jarri du Realak, Twitterren zabalduriko txio batean.

«Zutaz harro», idatzi du Alavesek.

Antzeko mezua plazaratu du Eibar taldeak.

Aurrekariak

Australiarrak gertuen duen kasua Andy Brennanena da; futbolari hark ere homosexuala zela aitortu zuen 2019an, Australiako bigarren mailan jokatzen ari zenean.

Badira beste pare bat aurrekari ere, baina gaya zirela erretiroa hartu ostean iragarri zutenenak. Thomas Hitzlsperger da bat, Aston Villa, Stuttgart, Lazio, West Ham, Wolfsburgo eta Everton taldeetan jokatu zuen alemaniarra; futbol profesionala utzi eta urtebetera esan zuen hark gaya zela, 2013an. Urte hartan bertan aitortu zuen bere homosexualitatea Robbie Rogers estatubatuarrak ere, Premier Leagueko Leeds United taldeko jokalari ohiak; otsailaren 15ean erretiratu egin zela esan zuen gaya zela iragartzearekin batera, baina maiatzean Los Angeles Galaxyrekin hasi zen.

Futboletik kanpo, Carl Nassib NFL futbol amerikarreko ligako jokalariak eman zuen aurrerapausoa aurtengo ekainean. Las Vegas Rangerseko jokalariak Instagram bidez egin zuen aitortza, eta esan zuen arduragatik egin zuela publiko gaya dela: «Espero dut egunen batean horrelako bideoak beharrezkoak ez izatea». Adierazi zuen bestea onartzearen aldeko kultura bat, errukitsua dena, sustatzearen alde egingo duela lan. Bide batez, azaldu zuen LGTBQ komunitatean suizidioa prebenitzeko lan egiten duen proiektu bati 100.000 dolar emango zizkiola.

Nassiben adierazpenak oihartzun handia izan zuen, eta NFLko hainbat taldek eta jokalarik babesa adierazi zioten hari ere.

Justin Fashanuren kasua

Futbolean bada gogoan izatea merezi duen beste kasu bat: Justin Fashanurena. Fashanu beltza, txiroa eta gaya zen, baita 80ko hamarkadako aurrelari bikaina ere. Ingalaterrako Norwichen bikain ibili ostean, garaiko talde onenetako batek fitxatu zuen: Nottingham Forestek. Lehen aldiz, jokalari beltz batengatik milioi bat libra baino gehiago ordaindu zituen klub batek.

Han, ordea, Brian Clough izan zuen entrenatzaile, eskola zaharreko entrenatzaile horietako bat, eta hark behin baino gehiagotan aurpegiratu zion homosexualen tabernetan ibiltzea. Azkenean, entrenatzailearen jokabidea, errendimendu eskasa eta zaleen irainak pilatu zitzaizkion Fashanuri, eta taldetik bereizi zuen klubak.

Azkenean, gogoz kontra eman behar izan zuen bere sexualitatearen berri. The Sun egunkariak xantaia egin zion, eta bere azalean atera zuen aurrelaria: «Milioi bat librako futbol izarra: gaya naiz», zen azalaren izenburua. Orduan amaitu zen bere futbolari ibilbidea; bere familiak baztertu egin zuen, baita hedabideek ere.

1998an bere buruaz beste egin zuen, 37 urterekin, Londresen. Hilabete lehenago, mutil batek sexu eraso bat egin izana egotzi zion AEBetan, eta han bidezko epaiketarik izango ez zuelakoan itzuli zen Erresuma Batura. Bere agur oharrean idatzi zuen ez zuela eraso hori egin: «Baimendutako sexua izan zen».

Espainiako ligetan, 142 profesional gay

Espainian, aurtengo martxoan, legez besteko proposamen bat aurkeztu zuen PSOEk kirolean sexu askatasunaren aurkako jarrerak saihesteko, bereziki futbolean. Haien datuen arabera, Europako gizartearen %6 LGTBI kolektiboaren parte da, eta, ondorioz, Espainiako futbol liga profesionaletan jokatzen duten 142 gizon ere bai.

Gizonezkoen Espainiako bi liga nagusietan hainbat euskal ordezkari daude; haietan, denera, ia mila jokalari daude, eta haietatik batek ere ez du esan gay dela.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

Beti Onakeko jokalariak Arrecifen (Espainia), asteburuan jokatu duten igoera fasean. ©Beti Onak

Gurpea Beti Onak Ohorezko Mailara igo da estreinakoz

Paulo Ostolaza

Asteburu honetan jokatu dute igoera fasea Arrecifen (Espainia), eta lehen bi neurketak irabazita lortu dute igoera. Datorren urtean hiru euskal talde arituko dira lehen mailan.

Eibarreko jokalariak, atzo, garaipena ospatzen. ©Jaizki Fontaneda / Foku

Eibarrek ez du huts egin, baina oraindik ez du igoera ziurtatu

Aitor Manterola Garate - Paulo Ostolaza

Teneriferi irabazi dio bart Ipuruan, baina Valladolidek ere irabazi egin duenez, azken jardunaldira arte itxaron beharko dute Lehen Mailara itzultzeko. Reala B eta Amorebieta jaitsi egin dira.

Amandine Henry Lyoneko jokalaria, berak sarturiko partida lehen gola ospatzen, atzo Turinen. ©KIKO HUESCA/ EFE

Berea egin, eta besteari utzi ez

Aitor Manterola Garate

Olympique Lyonek zortzigarren aldiz irabazi du Txapeldunen Liga, Bartzelona gainditu eta gero Turineko finalean (1-3). Damaris Egurrola da lehen euskal emakumezkoa txapelketa irabazten

Athleticeko jokalariak Lezaman, lan saio batean, Marcelinoren azalpenak entzuten. ©MIGUEL TOÑA / EFE

Europa, ospakizuna, eta agurrak

Haritz Gallastegi

Athleticek Vila-Realen emaitza hobetu beharko du Conference ligan jokatzeko. Realak, Osasunak eta Alavesek ez dute ezer jokoan

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...