EQT Infraestructure inbertsio talde suediarraren esku geratuko da Solarpack eguzki energia fotovoltaikoan espezializatutako euskal enpresa, Espainiako Balore Merkatuaren Batzorde Nazionalak (CNMV) akzioak erosteko eskaintza publikoa baimendu ondoren. Modu horretan, estrategikotzat jo daitekeen beste euskal enpresa baten lema galduko du Euskal Herriak.
Solarpackek Algortan du egoitza (Getxo, Bizkaia), eta parke fotovoltaikoak ditu Espainian, Txilen, Perun, Uruguain eta Indian: 250 langile inguru ditu. EQT inbertsio taldeak, berriz, 26 funts ditu, eta 67.000 milioi euroko balioa duten aktiboak kudeatzen ditu. Besteak beste, Idealista Espainiako higiezinen merkatuko liderraren eta Frantziako Nest etxebizitzen sustatzailearen jabea da.
Operazioarekin, Solarpack osoa erosi nahi du, 881 milioi euroren truke. Horri esker, eguzki energiako konpainiako bazkide fundatzaileek, Galindez eta Ibarra Kareaga familiek, 445 milioi eskuratuko dituzte.
EQTk 26,5 euro eskaini ditu akzio bakoitzeko. Ohar batean, burtsako arautzaileak azaldu du prezioa «behar bezala justifikatuta» dagoela, eta eskaintza bat datorrela indarrean dauden arauekin.
Suediako funtsak Banco Santanderrekin sinatutako abal bat du, eskainitako zenbateko osoaren ordainketa bermatzen duena, eta dagoeneko akordio batera iritsi da Beraunberri, Landa LLC eta Burgest 2007 sozietateekin, Solarpacken kapitalaren % 50 baino zertxobait gehiago kontrolatzen duten Galíndez familiako sozietateekin, enpresan duten partaidetza erosteko.
Eskaintza eraginkorra izan dadin, Solarpacken kapital sozialaren %75 eskualdatu beharko da gutxienez: 24,9 milioi akzio. Eta hiru asteko epean burutu beharko da. CNMVren oniritziaren ondoren, operazioak beharrezko baimen guztiak ditu. Aurretik, irailaren 28an, Espainiako Gobernuko Ministroen Kontseiluak eman zuen bere oniritzia.
