Ez da ezustekorik izan Sherpa Ai Aizkolari Txapelketan: gizonezkoetan, iaz bezala, Iker Vicentek irabazi du, eta emakumeetan ere Karmele Gisasola Zelai III.a faboritoak irabazi du. Ikuskizun ederra eman dute gaur goizean Bilbao Arenan.
Gizonezkoetan, sei aizkolari aritu dira. Irabazleak, Vicentek, bi minutu eta hamar segunduko tartea atera dio bigarren sailkatuari, Mikel Larrañaga Gipuzkoako txapeldunari. 39 minutu eta 37 segundu behar izan ditu hamabi enborrak mozteko. Hasieratik hartu du aurrea, eta amaierara arte eutsi dio. Eneko Otaño izan da hirugarren, Atutxa III.a laugarren, Txikia IV.a bosgarren, eta Jon Irazu seigarren.
Emakumezkoetan, aise gailendu da Gisasola, eta Uxue Ansorregik baino minutu bat eta hamabost segundu gutxiago behar izan ditu lanak amaitzeko. Hirugarren Maika Ariztegi izan da.
