Albistea entzun

Garraioa

Hiruk ohartarazi du «gero eta larriagoa» dela garraiolarien egoera

Kamioilari autonomoen sindikatuak azaldu du haien tarifak berberak direla oraindik, bidesariak ugaritu eta gasolioaren prezioa igo arren. Protesta egin dute Bidegiren egoitzan; azken lau urteetan N-1 eta AP-15 errepideetan kobratutakoa itzultzeko eskatu dute.

Kamioilari batzuk, astelehen honetan, Lasarte-Oriako atseden lekutik irteten
Kamioilari batzuk, astelehen honetan, Lasarte-Oriako atseden lekutik irteten Andoni Canellada (Foku) Tamaina handiagoan ikusi

Jokin Sagarzazu -

2021eko azaroak 29 10:42

Mobilizazio kanpaina betean daude Euskal Herriko kamioilariak, protesta eta lanuzteekin. Haiek ere nabaritzen ari dira energien garestitzearen ondorioak, gasolioarena zehazki, eta horrekin batera errepide nagusietan bidesariak jartzeko joera gero eta zabalduagoarenak. Horri gehitu behar zaizkio sektorearen aspaldiko arazoak eta, bereziki, lan baldintzen okertzea. Haien egoera «gero eta larriagoa» dela salatzeko, kamioi martxa bat egin dute astelehen honetan, Hiru garraiolari autonomoen sindikatuak deituta, Gipuzkoan.

N-1eko Lasarte-Oriako atseden lekutik Aritzetaraino joan ziren, Bidegiren egoitzaraino, asmo jakin batekin. Lurraldeko kamioilariak aspalditik ari dira kexuan N-1ean, AP-15 Leitzarango autobidean eta A-636 Beasain-Bergara autobidean jarritako bidesariengatik. Aurreneko bi errepideetakoak kamioiek soilik ordaindu dituzte azkenengo lau urteetan, baina diputazioak bidesari horiek eten zituen urrian, auzitegiek behartuta; 2023an neurria berrezartzeko asmoa du.

Hori iritsi bitartean, kamioilariek uste dute orain arte kobratutakoa itzuli behar dietela. Astelehen honetan Bidegiren egoitzara joandakoek horixe bera eskatu zuten. Aldundiak, hala ere, esana du soilik epaitegitik datozen eskaerak hartuko dituela aintzat. Hirurentzat, «arduragabekeria» da hori, uste baitu diputazioak modu automatikoan egin dezakeela hori, garraiolariak auzitara jotzera behartu gabe.

Administrazioari eta patronalari kritika

Protesta zehatz horretaz harago, Euskal Herriko kamioilariek kezkaz begiratzen diote bidesariak ugaritzeko joerari. Gipuzkoan bezala, Nafarroan eta Bizkaian ere aurki hasiko dira kobratzen errepide batzuetan, eta Araban aztertzen ari dira non jarri. Administrazioentzat ezinbestekoa da neurria, mantentze lanak ordaintzeko, baina kamioilariek uste dute bideak konpontzeko dirua biltzea ezin dela haien bizkar jarri, eta zergekin ordaindu behar direla.

Hiruk azpimarratu du bidesariena sektoreko langileei emandako beste kolpe bat dela, «administrazioaren utzikeriarekin, laguntzarik ezarekin eta zerga presioa areagotzearekin batera». Patronalen jarrera ere salatu du, sektoreko enpresek kargatzaileei ordaintzen dietena ez delako igo garraiolariaren gastuen igoeraren neurri berean.

Hain justu, patronalek ere antolatu dituzte protestak: lanuzte batera deitu dute Gabonen atarirako, abenduaren 19tik 22rako, baina horretan ez du parte hartuko Hiruk. Argudiatu du patronalak kamioilarien arazo ekonomiko askoren erantzule direla. Horren ordez, mobilizazio egutegi propioa antolatu du Hiruk.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

Shangaiko portua, edukiontziz beteta ©Alex Plavevski (Efe)

NDFk aurtengo hazkunde aurreikuspenak apaldu ditu

Jokin Sagarzazu

Kezka agertu du AEBetako eta Txinako ekonomien bilakaeraren eta inflazio tasa handien inguruan.

Altan Bernedoko langileak, Gasteizko Santiago ospitalaren aurrean protestan. ©Jaizki Fontaneda / Foku

Bi hilabeteko grebaren ondoren, konponbidea urrun dago Bernedoko Altan

Aitor Biain

Osakidetzak isuna jarri dio Arabako enpresari, gatazkaren ondorioz botikak jaso ez dituelako.

Metalgintzako bi langile, Bizkaiko enpresa baten aurrean ©Luis Tejido (Efe)

Bizkaiko metalak 2023ra arte atzeratu du susperraldia

Jokin Sagarzazu

Jarduera maila %77,5 da gaur egun. Hiru enpresatik batek ez zuen irabazirik lortu iaz. 2022an 1.000 lanpostu sortzea aurreikusten dute. Patronalak «oso zail» ikusten du soldatak KPIaren igoerara egokitzea.

CAFen tren elektriko bat, Aucland hirian ©CAF

CAFek 130 milioi euroko kontratua sinatu du Zeelanda Berrian

Jokin Sagarzazu

23 tren elektriko egingo ditu Zeelanda Berriko Auckland hirirako.

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Izan BERRIAlaguna

Zure babes ekonomikoa ezinbestekoa zaigu euskarazko kazetaritza independente eta kalitatezkoa egiten segitzeko.