Albistea entzun

Mendia

Everestera igotzeko beste bide bat aurkitu dute

Aurkikuntza garrantzitsua da, Everesteko igarobide arriskutsuenetako batetik ez igarotzeko modua emango baitie alpinistei: Khumbuko ur jauzia. 1953tik 44 hildako izan dira han.

Khumbuko glaziarra
Khumbuko glaziarra ALEX TREADWAY / EFE Tamaina handiagoan ikusi

Ainara Arratibel Gascon -

2021eko abenduak 3 16:53

Frantziako eta Nepalgo eskalatzaile batzuek iragarri dute beste bide bat aurkitu dutela Everestera igotzeko. Nepalgo aldetik igotzeko aukera emango luke, eta aurkikuntza garrantzitsua da, Khumbuko izotzezko ur jauzia igarotzea saihesteko aukera emango lukeelako. Ur jauzi hori oso arriskutsua da. Marc Batard alpinistak honela azaldu du aurkikuntza: "Aurkitu dugun bidea 5.164 metrotik hasten da, Gorakshepetik, Everesteko oinarrizko kanpalekuaren azpitik. Nuptseko mendebaleko beheko harrizko oinarritik pasatzen da. Hortik lehen kanpalekura joaten da, eta hala ez da Khumbutik igaro behar. Biziak salbatzen lagunduko duen bide bat da".

Batardek azaldutakoaren arabera, zazpi ordu inguru beharko dituzte alpinistek 1.000 metro inguru egiteko, eta hala 6.200 metrora igoko dira, justu lehen kanpalekuaren gainetik, 6.050 metro ingurura. "Udaberriko denboraldian probatuko dugu, martxo eta maiatz artean. Eta horren arabera ikusiko dugu espedizio komertzial batek erabil dezakeen".

Khumbu izotzezko ur jauzia 5.500 eta 5.800 metro artean dago, Everesten oinarrizko kanpalekuaren gainean. Ohiko bideari jarraituz, normalean alpinistak gauean edo goizalean iristen dira hara: 03:00-05:00 artean. Izotz blokeak egonkorren dauden unea da, eta elur jausiak gertatzeko arriskua txikiagoa da. Baina, hala ere, ez da batere erraza hura igarotzea, ezta eskarmentua duten gidari eta xerpentzat ere. Lauzpabost ordu behar dituzte ur jauzia igarotzeko. "Proba ondo ateraz gero, oso lagungarria izango da haientzat ere".

Khumbun izandako istripu larrienetakoa 2014an gertatu zen, glaziar bateko zati bat hautsi eta gero. Hamasei xerpa hil ziren, eta denboraldi hartako espedizio guztiak bertan behera geratu ziren. Azken datuen arabera, 1953 eta 2016 artean 44 pertsona hil dira han.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

Kopuruz antzera, baina soinean kolore berriak dituztela

Kopuruz antzera, baina soinean kolore berriak dituztela

Eñaut Agirrebengoa

Euskal Herriko 42 txirrindulari ariko dira aurten profesionaletan, horietatik hamabi World Tourrean. Movistar bilakatu da eliteko bilgune

«Movistarren, baldintza guztiak betetzen dira ongi eta gustura sentitu nadin»

«Movistarren, baldintza guztiak betetzen dira ongi eta gustura sentitu nadin»

Eñaut Agirrebengoa

Bi urtez Astanan aritu ondoren, denboraldi honetan Movistarren elastikoa jantziko du Aranburuk. Elitean urratsak egiten jarraitu nahi du, arreta klasikoetan jarrita. Printzipioz, ez da lehiatuko Euskal Herriko Itzulian.
Jesus Owono Alaveseko atezaina Afrika kopan ari da. ©BERRIA

Erakusleiho izan daiteke

Iñaki Berastegi

Ekuatore Gineako selekzioarekin, Afrika Kopa jokatzen ari da Jesus Owono atezaina, estreinakoz. «Ez dut alferrik galduko aukera hau». Multzoen fasea gaindituta, Maliren aurka jokatuko dute final-zortzirenetako kanporaketa, bihar.

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Izan BERRIAlaguna

Zure babes ekonomikoa ezinbestekoa zaigu euskarazko kazetaritza independente eta kalitatezkoa egiten segitzeko.