Klubetik kanpo da jadanik. Gernikako errugbi taldeak bere jokalarietako bat kanporatu du berriki, indarkeria matxistarekin loturiko delitu baten harira. Klubeko lehendakari Iñaki Uribek eman du albistearen berri. Joan den abenduaren 31n, Urtezaharrean, Ertzaintzak taldeko jokalari bat atxilotu zuen, bikotekideari eraso egin izana leporatuta. Uribek kontatu duenez, Polizia berehala jarri zen taldearekin harremanetan, eta klubeko zuzendaritza taldea ziztuan bildu zen gertatutakoari nola erantzun zehazteko. Taldetik kanporatzea erabaki dute.
«Klubeko kideek geure egiten ditugu errugbiaren berezko balioak, eta, beraz, horrelako ekintza batekin zerikusia duen keinu txikiena ere onartezina da guretzat. Gertatutakoa jakin bezain pronto, jazotakoaren egiazkotasuna zalantzan jarri gabe, harremana errotik moztea erabaki», adierazi du Gernika errugbi taldeko lehendakari Iñaki Uribek Radio Euskadin eginiko elkarrizketa batean. Irmoki gaitzetsi du erasoa.
Eusko Jaurlaritzako Segurtasun Departamentuak ez du oraindik ere auziaren gaineko informaziorik plazaratu. Dena dela, Uribek zehaztu du jokalaria ez dagoela atxilotua dagoeneko. Halaber, erantsi du, taldea ez ezik, jokalariak jadanik abandonatu duela klubak hari utzitako bizitokia ere.