Albistea entzun

Plataformak

Espainiako Amazonek fikziozko lan berriak euskaratuko ditu

Ordainpeko plataformak iragarri du lan berriek euskarazko, katalanezko eta galegozko bikoizketak edo azpidatziak izango dituztela. Pantailak Euskaraz-ek Amazon Prime Videori eskatu dio euskarara bikoiztuta dauden audioak katalogoan sartzeko.

'Sin huellas' telesailaren grabaketak
'Sin huellas' telesailaren grabaketak Amazon Prime Video Tamaina handiagoan ikusi

Urtzi Urkizu -

2022ko urtarrilak 15 15:09

Zalantzazkoa da oraindik Espainiako Ikus-entzunezko Lege Orokor berriak zer neurritan behartuko dituen streaming plataformak edukiak euskaraz ematera. Baina legea tramitazio bidean dela, Amazon Prime Videoko plataformak zera iragarri du: «Amazonen Espainiako film eta telesail original berriak euskarara, katalanera eta galegora azpidatzi edo/eta bikoiztuko dira». Orain arte ez du halakorik egin ordainpeko plataformak.

Koro Castellano Amazon Prime Videoko Espainiako zuzendariak beste hedabide batean esandakoa berretsi dio BERRIAri, hitz hauekin: «Espainian daukagun aberastasun handienetakoa kultur eta hizkuntza dibertsitatea da, eta Amazon Prime Videon sustatu nahi dugu edukiak katalanez, euskaraz eta galegoz ikusi ahal izatea».

Kontraesana da adierazpen hori Amazon Prime Videok orain arte erakutsi duen bidearekin, ez baitu orain arte telesailik ekoitzi ez katalanez, ez galegoz, ez euskaraz. Esate baterako, Gipuzkoako zenbait herritan grabatu du El Internado: Las Cumbres suspentsezko telesaila, eta euskarazko hitz bakar bat ez da entzuten fikzio horretan.

Amazon Prime Videon 98 lan ikus daitezke katalanez. Euskarazko audioarekin eta azpidatziekin, Dragoi Bola-ren bi film baino ez daude.

Amazon Prime Videok asteon aurkeztutako proiektuen artean, Amaia Muruzabal (Iruñea, 1979) gidoilari eta ekoizle eragile duen Reina roja telesaila dago. Juan Gomez-Juradoren eleberrietan oinarritutako fikzio bat da, eta ezohiko adimena duen emakume baten gorabeherak kontatuko ditu. Los Farad telesaila, bestetik, 1980ko hamarkadako Marbellan (Espainia) girotuko dute. Sin huellas izeneko paella western-a, berriz, Bartzelonan eta Alacanten (Herrialde Katalanak) girotuko dute, eta zuzendarien artean Koldo Serra (Bilbo, 1975) egongo da. Aurkeztu dituzten filmen artean —eta euskaraz ere ikusi ahalko direnen artean—, hauek daude: Awareness zientzia fikziozko pelikula eta Mañana es hoy komedia.

Pantailak Euskaraz ez da fio
Ikusteko dago beste plataformek zer bide hartzen duten. Pantailak Euskaraz taldeak ontzat jo ditu Castellanok egindako adierazpenak, baina kezkaz ohartarazi du: «Ezin daiteke jakin hizkuntza gutxituen aldeko hautu hori ekinbide propioz egin duten ala 2022an tramitazio parlamentarioan dagoen eta 2023rako indarrean egotea espero den Ikus-entzunezko Lege Orokor berriak ezarri ditzakeen betebeharrei aurre hartzeko egin duten». Talde euskaltzalearen aburuz, «borondate ona» erakusteko «aukera aparta» dute orain: «Euren katalogoan dituzten, euskarara bikoiztuta dauden, baina euskarazko audiorik gabe eskaintzen dituzten film eta telesail guztiak ere euskaraz ikusteko aukera txertatu dezatela». Adibidetzat jo dituzte Ballerina eta Playmobil filmak zein Dora esploratzailea eta Hirukiak marrazki bizidunetako telesailak. Euskarara bikoiztuta daude, baina ezin dira plataforman hizkuntza horretan ikusi.

Pantailak Euskaraz-ek «pozgarritzat» jo du enpresa pribatu handi batek euskararen bikoizketaren eta azpidatzien aldeko hautua egitea. «Baina ezin da euskararen presentzia euren hautuan soilik utzi. Legez bermarazi behar da, izan ere, aldeko hautua egin duten era berean egin dezakete bihar kontra. Euskal gizarteak eta euskarazko bikoizketa eta azpidatzien sektoreak egonkortasuna eta epe luzerako bermeak behar ditu kalitatezko zerbitzua eman eta jaso ahal izateko».

Euskararen Kontseiluarekin, Topagunearekin eta Hekimenekin elkarlanean jarraituko du Pantailak Euskaraz-ek Espainiako lege berrian jaso dadin plataformek hizkuntza gutxituetan behar dituztela izan edukien %6. Halaber, RTVEn edukiak euskaraz eskaintzeko eskaerarekin jarraituko dute. «Legeak bete daitezen, bestalde, beharrezkoak dira ikus-entzunezko kontseiluak sortzea EAEn eta Nafarroan».

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

Iruñeko Braulia erraldoia Udaletxe plazan dantzan, 2019ko irudi batean. ©Jagoba Mantero, FOKU

Braulia erraldoiaren dantza, haurren izu

Berria

Herritarrak hunkitu ditu azken egunotan Iruñerrian zabaldutako bideo batek: irudiotan, Iruñeko Braulia erraldoiaren dantza, lau begi gazte balkoian, eta ate danbateko bat, izuaren izuz.

Txikiren ama Antonia Maria Manot, haren semearen hiletan. ©BERRIA

Ez ahanzteko ariketak

Gotzon Hermosilla

Natalia Ginzburg idazleak testu bat argitaratu zuen garai hartako prentsan 1975eko irailaren 27ko fusilamenduen harira. Orain, testu hori euskarara ekarri du Josu Zabaletak; itzultzaileak FRAPeko hiru kondenatuak ezagutu zituen espetxean.

 ©JAGOBA MANTEROLA / FOKU

«Emakume informatikari erreferenteak behar dira»

Unai Etxenausia

II. Gladys saria jasoko du gaur Perez de Viñasprek. Gaztea izan arren, ibilbide oparoa du informatikan. Nabarmendu duenez, gustatzen zaizkion ikerketak egiten aritu nahi du aurrerantzean ere.
Fusilamenduen 40. hurrenarekin batera Vigon herri-harpidetzaz ezarritako iragarkia. ©INFO.NODO50.ORG

Fusilaturik isilgordeena, Garcia Sanz

Miel A. Elustondo

1975eko irailak 27 beti. Frankismo garaiko azkeneko bost fusilatuak. Sanchez Bravo, Garcia Sanz, Baena, Txiki, Otaegi. Haien ondoan militante ez gutxi, heriotzara kondenatuak izanak, zigorra kommutatuak. Askoren artean, Manuel Blanco Chivite. Bizi-bizirik du egun haietako oroitza samina. Ilun beltzaren muturrerainoko bidaia. Azkena.

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...

Izan BERRIAlaguna

Irakurleen babesa ezinbestekoa da kazetaritza independente eta konprometitua egiten jarraitzeko.