Albistea entzun

Zikloturismoa

Itsasondoar bat Euskal Herriko mugan aritu da bizikletaz, lau muturretatik igarota

Aitor Garmendiak Euskal Herriko lau muturrak lotzen dituen ibilbide bat egin du, mugetatik ahalik eta gutxien urrunduta: «Wikipedian begiratu nuen zeintzuk diren Euskal Herriko lau muturrak, eta egin nezakeen ibilbidea diseinatu nuen».

Aitor Garmendia Bardeetan (Nafarroa), bere bizikletarekin, pasa den astean.
Aitor Garmendia Bardeetan (Nafarroa), bere bizikletarekin, pasa den astean. Aitor Garmendia Etxeberria Tamaina handiagoan ikusi

Paulo Ostolaza -

2022ko urtarrilak 25

«Azterketak bukatu, eta sei egun libre nituen. Bizikleta gustatzen zaidanez, zakutoak hartu eta zerbait berezia egitea pentsatu nuen, eta horixe bururatu zitzaidan: Euskal Herriari buelta ematea». Horrela hasi zen Itsasondoko (Gipuzkoa) Aitor Garmendia Etxeberriak joan den astean egin zuen bidaia.

Bost egunez, bizikletaz, Euskal Herriko mugen inguruan ibili zen, lau muturretatik igarota: Samatze (Nafarroa Beherea) iparraldean; Eskiula (Zuberoa) ekialdean; Cortes (Nafarroa) hegoaldean; eta Lanestosa (Bizkaia) mendebaldean. Denera 1.050 kilometro, 41 ordu, eta 11.500 metroko desnibela.

Garmendiak joan den astean egin zuen erronka, urtarrilaren 17tik 21era. Bidaiari ekin aurretik planifikatu zuen etapa bakoitza: «Bost egunean egiteko moduan prestatu nuen, egun bat badaezpada gordetzeko». Ostatuak, ordea, ez zituen aurrez hartu: «Gutxi gorabehera bazkalorduan hasten nintzen non lo egin begiratzen, zenbat ordu neuzkan eta zenbat kilometro egin nitzazkeen kontuan hartuta». Nagusiki ostatuetan eta aterpetxeetan egin zuen lo, baina etapa bat Bilbon bukatzea aurreikusi zuen, han baitu ikasle pisua.

Banan banan, hauek izan dira bost etapak: Itsasondotik (Gipuzkoa) Barkoxera (Lapurdi), Barkoxetik Valtierrara (Nafarroa), Valtierratik San Vicente de la Sonsierrara (Errioxa), San Vicente de la Sonsierratik Bilbora, eta Bilbotik buelta Itsasondora.

Twitterren argitaratu dituen argazkietan, paisaia oso ezberdinak ikus daitezke: «Ikusi dut sekulako aldaketak daudela, bai. Euskal Herria txikia dela esaten dugu, baina denetarik dago», nabarmendu du.

Etaparik politena bigarrena izan zen Garmendiarentzat: «Barkoxetik abiatu eta Valtierraraino joan nintzen. Goizean goiz Pirinioetan ikusi nuen eguzkia irteten, eta sartzen, berriz, Bardean ikusi nuen. Oso polita izan zen hori».

Zailenak, berriz, hurrengo bi egunak izan ziren. Nafarroako Erriberan haizea kontra tokatu zitzaion, eta aitortu du egun hori «oso luzea» egin zitzaiola. Laugarren egunean, berriz, euriak zaildu zion bidea: «Arabako Errioxatik irten, eta Bizkairantz jo nuen. Bidean jaitsiera luze asko izan nituen, eta hotz handia pasatu nuen». Ibilbide ederra dela esan du, baina bakarrik egiteko ordu asko direla eta gogorra egin zitzaiola ere bai.

Ibilbide hori egiteko ideia norbaiti hartu ote dion galdetuta, ezetz dio Garmendiak; agian norbaitek egingo zuela, baina berak ez duela ikusi: «Wikipedian begiratu nuen zeintzuk diren Euskal Herriko lau muturrak, eta horietatik pasatuta eta mugetatik ahalik eta gertuen ibilita egin nezakeen ibilbidea diseinatu nuen», kontatu du. Tarte batzuetan Burgosen, Errioxan eta Kantabrian ere sartu da.

Sareetan hainbat erabiltzailek zoriondu dute egitasmoagatik, eta ibilbidea ere eskatu diote. Gehiago animatuko ote dira Euskal Herriari buelta ematera?

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

 ©RAUL BOGAJO / FOKU

«Ingurukoei maite ditudala esateko modua da poesia»

Unai Etxenausia

Zorione Erezuma olerkigileari barren-barrenetik ateratzen zaio poesia idaztea. Bere olerki ikuskizunak «meditazio bidaia mistiko» moduan definitzen ditu.
Haurrak eta Hazi eta Ikasiko boluntarioa eskolako lanak egiten, Morlanseko lokalean. ©GORKA RUBIO / FOKU

Irakasle, konplize eta bidelagun

Jakes Goikoetxea

Donostiako Hazi eta Ikasi elkarteak eskolako lanak egiten eta ikasten laguntzen die zailtasunak dituzten familietako haurrei. Haurren itxaron zerrenda luzea dute, baina boluntarioak falta dituzte, boluntario euskaldunak.

Iñaki Zarraoa, Alberto Surio, Josu Ortuondo, Maite Iturbe, Jose Maria Gorordo eta Andoni Ortuzar EITBko zuzendari nagusi ohiak eta Andoni Aldekoa gaur egungo zuzendari nagusia, atzo, Bilbon. ©MARISOL RAMIREZ / FOKU

Aldekoak esan du EITBk datozen aldaketei aurre egin behar diela

Urtzi Urkizu

EITBren 40. urteurreneko ekitaldia egin dute, Bilbon. Politika, kultura, gizartea eta ekonomia arloetako 300 gonbidatu inguru bertaratu dira

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...