Fernando Sesma Hezkuntzako, Herritarren Partaidetzako eta Gazteriako zinegotzi ordezkaria eta Iruñeko Udal Haur Eskolak erakunde autonomoko presidenteak prentsaurrekoa eman du gaur udalaren eskaintzaren berri emateko. Azaldu duenez, iaz hasitako «hizkuntza eskaintzaren berregituraketari» eutsi dio Iruñeko Udalak, hizkuntza eredu mistorantz «eboluzionatuz» joateko helburuarekin.
Navarra Sumaren eta PSNren aldeko botoekin onartu zuten proposamena, iaz, eta, erabaki hori ikusirik, EH Bilduk adierazi zuen udalak euskarazko murgiltzea«amaitu» nahi zuela, euskarazko ereduan «ingelesezko jarduerak sartzera behartuz». Horrez gain, Haur Eskolak Euskaraz plataformak adierazi zuen udalak «euskara desagerraraztea eta ingelesa inposatzea» zuela helburu, eta Hezkuntza Departamentuari eskatu zion euskarazko eredua hirian zabaltzeko. Plataformak, gainera, nabarmendu zuen euskarak «babes eremuak» behar dituela gaztelera eta ingelesa bezalako hizkuntzek «zapaldu ez dezaten», eta ziurtatu zuen murgiltze eredua dela euskararen «babes eremu bakarra».
Iruñeko haur eskola guztietako zuzendariek ere adierazpen bat sinatu zuten, hizkuntza ereduak «ez aldatzeko» eskatzeko. Azaldu zutenez, «adin goiztiarrean» hirugarren hizkuntza bat sartzeak euskararen ikaskuntzari, ingelesari eta haurraren garapenari «kalte» egin diezaioke.
