Gernikak Ohorezko B Mailan jokatu du datorren urtean. Basurdeek erronka zaila zuten azken jardunaldian: Valladolideko El Salvador hartu behar zuten etxean, ligako liderra, eta, irabazteaz gain, Alacanteko La Vilak galtzea behar zuten. Lehen baldintza, euren eskuetan zegoena, bete dute gernikarrek (29-23), baina La Vilak ez du hutsik egin Les Abellesen kontra (17-24). Ondorioz, zuzenean maila galdu du Gernikak.
Amaiera / Final @GernikaRT 29 - 23 @Chami_Rugby
— Gernika Rugby Taldea (@GernikaRT) April 24, 2022
Txapela kentzeko moduko partida basurdek!! Urbietan ligako lehen garaipena liderran kontra!! Ezin izan dugu maila mantendu, baina datorren denboraldira begira bizirik jarraitzen dugula argi utzi duzue! 💪💪ðŸÂ—ðŸÂ—ðŸ‘ÂðŸ‘Â#aupaGRTpic.twitter.com/W6jxN6XSdO
Lehen Mailara igo eta urtebetera itzuliko da Gernika bigarren mailara. Denboraldia, ordea, modu duinean amaitu dute bizkaitarrek; inork gutxik espero zuen El Salvador menderatuko zutenik. Aurrelarien lan bikainari esker, ordea, hobeak izan dira etxekoak, eta denboraldiko hirugarren garaipena poltsikoratu dute.
Oraingoz, beraz, Ordizia da Euskal Herriak Ohorezko Mailan duen ordezkari bakarra —igoera fasea jokatuko du Getxok—. Gipuzkoarrek, gainera, garaikurra altxatzeko kanporaketa jokatuko dute: gaur Santboianari irabazi diote (34-32) Altamiran, eta, horri esker, fase erregularreko laugarren postua ziurtatu dute. Kantxa faktorea alde izango dute Sevillako Cienciasen aurka jokatuko duten kanporaketan, final-laurdenetan.