Arabako Auzitegiak Aldanondo gazta enpresaren alde egin du, horrek Generali aseguru etxearekin duen auzian. 2018ko abuztuan, Aldanondok Agurainen duen pabiloia erre egin zen, eta aseguru etxeak salatu zuen nahita eragindakoa izan zela. Arabako Auzitegiak ebatzi du ez dagoela horren frogarik. Instantziako auzitegiak ebatzi zuen moduan, horrek ere adierazi du sutea kargagailu elektriko batera konektatuta zegoen lurra garbitzeko makina batean hasi zela.
Aldanondok 44,4 milioi euro eta interesak eskatzen zizkion Generaliri, bien arteko kontratuko baldintzetan oinarrituta. Gasteizko instantziako auzitegiak 29,4 milioi eurora murriztu zuen, eta Arabako Auzitegiak orain ebatzi du hogei milioi eurokoa izan behar duela. Gaur argitaratu da epaia, eta horren kontra Auzitegi Gorenera jo dezakete bi aldeek.