Realeko zaleak jipoitu zituen joan den maiatzaren 15ean Espainiako Poliziak Vila-realen. Hainbat zauritu izan ziren, eta hiru lagun atxilotu zituzten gerora. Zehazki, erasoa nozitu zuten zaleak Bultzada taldekoak ziren. Orain, jipoia gertatu eta bost egunera, oharra argitaratu du Realak, «Vila-realen gertatutakoak gaitzesteko».
Ikusi gehiago: Realeko zaleak jipoitu zituen atzo Espainiako Poliziak Vila-realen
Klubak oharrean adierazi duenez, Reala Bultzada Txuri Urdinako zenbait ordezkarirekin bildu da gaur, gertatutakoei buruz mintzatzeko. Bilkuraren ondotik plazaratu dute oharra, eta honakoa azaldu, besteak beste: «Realaren ustez, guztion zeregina da futbola eta futbol-zelaiak leku seguru eta jai-giroan egitea, zaleek beren taldeaz gozatu ahal izan dezaten mehatxatuta sentitu beharrik gabe eta are gutxiago inolako indarkeriaren biktima sentitu beharrik izan gabe».