Euskal Herriko Hizkuntzen Erabileraren Kale Neurketaren emaitzak duela gutxi argitaratu ditu Soziolinguistika Klusterrak, eta emaitza horien azterketa izango da aurtengo Euskal Soziolinguistika Jardunaldiaren muina. EHUren Bilboko Bizkaia Aretoan egingo dituzte jardunaldiak, ekainaren 22an.
Jardunaldian euskararen biziberritzean beharrezkoak diren gaien inguruan arituko dira, eta aktibistek, adituek eta erakunde arduradunek ondorioak eta iritziak partekatuko dituzte. Bestalde, datozen urteetarako erronkak identifikatzen ere saiatuko direla nabarmendu du Klusterrak.
Goiz eta arratsaldez tailerrak, hitzaldiak eta mahai-inguruak egingo dituzte, eta datuen interpretazio eta irakurketa erraztu dezaketen elementuak eskaintzeko baliatuko dute egitaraua. Hausnarketarako galderak ere luzatu dituzte: “Hizkuntza-erabilera nola aldatu den badakigu, baina... nola aldatu da kalea bera? Nola aldatu da euskaldunen testuingurua? Zein eragin izan du globalizazioak? Eta digitalizazioak? Zer dago jokoan hurrengo urteetan?”.
Pasa den astean argitaratu zituen Soziolinguistika Klusterrak 2021eko Hizkuntzen Erabileraren Kale Neurketaren emaitzak, eta Euskal Herrian euskararen kaleko erabilera orokorra 2016tik berdin mantendu dela nabarmendu zuten, %12,6. 2006. urtean izan zen euskararen kale erabilera maila altuena neurtu zuen urtea, %13,7, baina hurrengo bi neurketetan jaitsi egin zen, 2011n %13,2 eta 2016an %12,6 zela ikusi baitzuen.
Streaming bidez ere
Nahiz eta presentzialak izango diren, streaming bidez parte hartzeko aukera ere egongo da aurten. Klusterraren webgunean eman behar da izena, eta ekainaren 17a izango da izena emateko azken eguna. Matrikula arruntak 50 euroko prezioa du, baina ikasleek, langabetuek eta Klusterreko bazkideek 30 euroko prezio murriztua izango dute; streaming bidezko sarbideak hamabost euroko kostua izango du.
